Kapitaun Fragata hosi komponente navál FALINTIL-Forsa Defeza Timor Leste (F-FDTL), João Francisco Fatima alias ‘Buka Tuir’. Imajen/Julião Fernandes Guterres.

DILI, 22 outubru 2020 (TATOLI)-Prezidente Repúblika, Francisco Guterres Lú Olo, kinta ne’e presta ona omenájen ba Kapitaun Fragata João Francisco Fatima alias “Buka Tuir” iha ninia residénsia Colmera Dili.

Kapitaun Fragata hosi komponente navál FALINTIL Forsa Defeza Timor Leste (F-FDTL), João Francisco Fatima alias ‘Buka Tuir’ hakotu iis iha Hospitál Nacionál Guido Valadares (HNGV) tanba moras komplikasaun.

Notísia Relevante :Kapitaun Fragata ‘Buka Tuir’ hakotu iis iha HNGV

”Loron ohin ita lakon ita-nia ema di’ak ida no lakon mós ita-nia komadante boot ida husi marina ninia ami mai hato’o sentidu kondelénsia em lutada ba família no oan ki’ak sira hotu no mós ba FALINTIL Forsa Defeza Timor Leste (F-FDTL) ,” Xefe Estadu Francisco Guterres Lú Olo, hato’o ba jornalista sira iha Colmera Dili.

Estadu no Governu sei nafatin proteze no fó nafatin atensaun ba matebian nia kaben no oan ki’ak sira.

”Kona-ba nia-oan sira ita sei proteze nafatin sira tanba matebian ne’e uluk sei moris ema ida ne’ebé mak pasiénsia liu no ema ida ne’ebé mak nunka kontra nia komadante no nunka hatan nia komadante sira halo servisu nonok de’it iha ai-laran tantu mai to’o iha vila, ha’u konese di’ak liu matebian nia hahalok,” Nia hateten.

Entretantu, Saudozo Kapitaun Fragata João Francisco Fatima alias “Buka Tuir” moris iha Loi-huno iha loron 10 fulan-outubru tinan 1969 no matebian husik oan ki’ak no família ho tinan 51.

Kapitaun Fragata João Francisco Fatima ‘Buka Tuir’ husik hela nia kaben ho oan na’in haat, feto na’in-rua (2) no mane na’in-rua (2) ho família.

Notísia Relevante :Komandu F-FDTL “lutu” lakon kuadru superiór João “Buka Tuir”

Jornalista: Felicidde Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here