Arquimino Ramos.

Husi: Arquimino Ramos, Dip.EPM,B.Bus, Lic.CSH, MM

Pedagojia maka siénsia ne’ebé dedika ba kestaun edukasaun, iha disionáriu portugés maka métodu sira ne’ebé ho objetivu ba adekuasaun konteudu informativu ba ema ne’ebé sei dirije (Conjunto de metódos que visam a adequaçao dos conteudos informativos as pessoas a quem se-dirigem).

Estadu Timor-Leste iha kompromisu dezenvolve setór edukasaun, haree husi planu estratejiku edukasaun ne’ebé públika husi ministériu edukasaun, iha vizaun katak 2030 Timor-Leste sei edukadu, iha koñesementu, no kualifikadu, moris produtivu, respeita, pás iha família no valór tradisionál pozitivu, ema hotu iha asesu hanesan ba edukasaun ne’ebé bele fó biban atu partisipa iha ekonomia, sosiál, prosesu dezenvolvimentu polítika, asegura equitativu sosiál, no unidade nasionál.

Atu atinje ida ne’e presiza esforsu lubuk ida husi parte hotu-hotu tantu governu, setór privadu no sosiedade akadémika. Haree husi parte governu hatuur ona lei númeru 14/2008, 29 outobru hatuur lei baze edukasaun Timor-Leste nian ho objetivu hala’o organizasaun, orientasaun, regula dezenvolvimentu sistema edukasaun. Iha artigu 1 alinea 4 kompete Estadu hodi asegura posibilidade dosente ne’ebé kualifikasaun adekuadu, infastrutura, meiu finanseiru nesesariu hodi garante edukasaun ida ne’ebé kualidade. Iha sorin seluk Governu estabelese ona sistema kontrolu liuhusi instituisaun ka ajénsia sira hanesan Ajénsia Nasionál Avaliasaun, Akreditasaun Akadémika (ANAAA) no Institutu Nasionál de Mao da Obra (INDMO) hodi instituisaun ka eskola sira kumpre padraun no rekizitu sira ne’ebé governu estabelese.

Tuir avaliasaun ne’ebé halo husi peritu internasionál sira ne’ebé governu konvida mai halo avaliasaun katak profesór universitáriu balu laiha manuál, planu lisaun (Lesson plan), planu sesaun (session plan), aprezentasaun power point no ekipamentu didaktiku sira atu hanorin tuir padraun hanorin ne’ebé di’ak, profesór sira laiha formasaun pedagojia ne’ebé sufisiente hodi hanorin, no maioria profesór sira mai husi programa estudu oin-oin hanesan siénsia sosiál, saúde, agrikola, enjiñaria, ekonomia, direitu no seluk-seluk tan ne’ebé ho grau mestradu no doutoramentu, maibé laiha formasaun pedagojia ne’ebé bele hakbiit sira hodi hanorin ho sistematiku tuir padraun.

Problema hirak iha leten akontese tanba Timor-Leste seidauk iha Academic board ka Konselu akadémiku ne’ebé estabwlese husi governu atu halo selesaun no rekrutamentu ba profesór sira. Hanesan iha Filipina, Japaun, Austrália no Qatar iha Academic board hodi halo selesaun no rekrutamentu ba profesór sira, liu-liu ba eskola públika sira. Atu liu selesaun ne’e kandidatu profesór sira tenke iha sertifikadu pedagojia husi nivel II too nivel V husi instituisaun sira ne’ebé akreditadu husi governu no iha abilidade atu prepara manuál, planu lisaun, planu sesaun inklui prepara powerpoint ba aprezentasaun nian.

Sentru Formasaun Polísia eziste kursu lubuk ida ne’ebé hetan akreditasaun husi INDMO no kursu ida maka hetan akreditasaun husi Ministériu Edukasaun ho programa Diploma. Kursu pedagojia Certificate IV in Education, Training and Assessment ne’ebé akademia polísia dezenvolve kleur ona husi 2004 ho investimentu boot iha área ne’e ho apoiu parseiru husi Austrália iha programa TLPDP.

Kursu pedagojia hodi tulun dosente ka formadór sira atu iha abilidade hanorin hahú husi preparasaun manuál, planu lisaun, planu sesaun, preparasaun aprezentasaun powerpoint iha aula, realiza avaliasaun diagnostiku, avaliasaun formativu, no avaliasaun sumativu inlkui dezenvolve instrumentu avaliasaun maka hanesan teste badak, kuiz, avalia paper ka makalah, avaliasaun ba aprsentasaun grupu, organiza sesaun no hanorin, dezena no dezenvolve rekursu apredizajem ho métodu GLOSS (Greetings, Link, objective, structure and simulation) no TOFF (Thanks, outcome, Feedback and future session), no sai avaliadór ka ezaminadór, David Smith;2016 hateten sesaun iha aula ida la uza Gloss no Toff ne’e la’ós hanorin maibé deskursu, tanba estrutura kada sesaun tenke klaru no feedback iha finál sesaun nian importante atu halo konfirmasaun. Mestre sira tenke iha kumpriensaun komun kona-ba programa estudu nia espesifikasaun, dezenvolve kurikulu ne’ebé bazea ba outcome ka impaktu (Outcome based curriculum) ne’ebé bele liga ho merkadu nia nesesidade, kurríkulu presiza kompozisaun husi koñesementu, abilidade no attitude (Knowledge, skills, and attitude) tuir Benjamin Bloom 1956.

Maske PNTL hahú kleur ona, maibé durante ne’e hanorin de’it dosente no formadór sira iha PNTL nia laran inklui ita nia estudante ka formandu sira husi São Tome e Prinsipe no Guine Bissau iha 2017 liuba. Kursu Pedagojia ne’e hahú hetan atensaun husi governu liu husi ANAAA ho prezensa Diretór Ezekutivu ANAAA Dr. Edmundo Viegas iha enseramentu kursu pedagojia parte teoria no abertura formasaun prátika iha sentru formasaun polísia Komoro loron 16-10-2020 ba korpu dosente 62 husi universidade da Pás ne’ebé partisipa iha kursu pedagojia. Iha deskursu Dr. Edmundo Viegas kongratula UNPAZ no SFP ne’ebé inisia ona formasaun pedagojia no nia hein katak ensinu superiór sira seluk bele la’o tuir instituisaun rua nia ain fatin atu hakbiit án hodi manorin nain sira hanorin tuir padraun ne’ebé sistematiku, tuir nia kursu primeiru ne’ebé rejista iha ANAAA no husu SFP aprezenta kurrikulu pedagojia ne’e ba ANAAA, ida ne’e hatudu katak Timor-Leste hahú eleva kualidade hanorin.

Reitór UNPAZ, Dr. Adolmando Soares Amaral, Lic.Eco, MM nu’udar formandu hato’o satisfasaun ba kursu ne’e, tanba ajuda tebes dosente hanorin ho sistemátiku.

Nia hateten dosente sira iha ona matenek maibé presiza iha koñesementu, abilidade no atutude di’ak hodi hanorin di’ak liutan liuhusi formasaun pedagojia, tanba maioria dosente seidauk iha formasaun adekuadu no barak mai husi programa estudu oin-oin ne’ebé la’ós husi fakuldade edukasaun. Iha sorin seluk Padre José Tacaen hanesan mos formandu kursu ne’e hateten kursu ne’e foin afirma án hanesan mestre loloos, tanba presiza hanorin ho estrutura no hakotu ona hanorin tuir idak-idak nian gostu.

Kursu ne’e hala’o bazea ba rekomendasaun husi peritu internasionál ne’ebé ANAAA konvida hodi avalia no akredita universidade sira iha Timor-Leste Prof Hazman H.A husi Malaysian Quality Assurance husu atu universidade sira hotu iha Timor-Leste bele fahe ba malu prátika di’ak ka best practice iha sistema ensinu aprendizajen ne’ebé iha ona padraun di’ak iha sentru formasaun polísia Komoro, Prof. Hazman husu Magnifiku Reitór sira ne’ebé marka presenza iha dizemina rezultadu avaliasaun loron 24-02-2012 atu lalika halo estudu komparativu iha rai liur ne’ebé gasta osan barak, tanba akademia polísia iha ona padraun ne’ebé di’ak. Prof Hazman husu ha’u atu partilha ho universidade sira iha Timor-Leste, maibé ha’u hatan ba nia katak ami akademia ne’e kiik no sira hanoin ami hanorin lei, tuku tebe no kaer ema de’it, karik universidade sira lakohi mai aprende ho ami, maibé nia dehan ha’u vizita ona ba universidade no institutu sira iha Timor laran tomak seidauk iha ida maka nia padraun di’ak ona hanesan sentru formasaun polísia.

Atu konklui, kualidade formasaun maka bele garante dezenvolvimentu ne’ebé sustentabel, tanba rekursu naturál sira bele mohu ka hotu, maibé rekursu umanu sei lahotu no bele kontinua dezenvolvimentu rai ida ne’e ho matenek di’ak. Ho esforsu sira ita neneik-neneik hasai duvida husi sosiedade kona-ba kualidade edukasaun iha Timor Leste. Rekomenda ba parte hotu atu hasae kualidade ensinu hanesan Austrália no rai dezenvolvidu sira seluk atu graduadu sira tasak iha matenek, abilidade no attitude ho ida ne’e bele kria rasik kampu servisu ba án no ba ema seluk iha futuru.

Hamutuk hadi’a kualidade edukasaun iha Timor-Leste no iha future ne’ebé nabilan, Vivat academia-vivat profesores!

Hakerek nain, Komandante Sentru Formasaun Polísia, Pos Graduado Iha Estudu Estratejiku ISCSP-Universidade Lisboa, Alumni APCSS Hawaii-Estado Unidu Amerika, Sertifikadu IV no V iha Pedagojia, Membru Board of Academic of INTERPA-International Police Academies Association no Estudante Programa Doutoramentu Universidade Katolika Wydia Mandala Surabaya.

HAKEREK NO HATÁN

Please enter your comment!
Please enter your name here