Traballadór sira halo hela reabilitasaun estrada iha área kampung Alor, Dili, kuarta (05/08). Imajen Tatoli/António Gonçalves

DILI, 22 outubru 2020 (TATOLI)–Inspetór Jerál Traballu (IGT, sigla portugés), Rofino Lopes dos Reis, informa durante situasaun Estadu Emerjénsia (EE) liga ho COVID-19, halo empreza barak maka hasoru difikuldade selu traballadór no balun ameasadu suspende atividade ekonómika.

“Ita identifika kuaze 400 resin kompañia maka iha situasaun ne’e iha difikuldade selu traballadór sira, tanba ne’e maka dala barak sira viola lei traballu,” Inspetór Jerál Traballu informa ba Agência TATOLI via telefónika, kinta ne’e.

Hosi inspesaun ne’ebé parte inspetór ne’e halo, hatudu katak situasaun atuál halo kompañia internasionál balun deside suspende atividade tanba la hetan rendimentu.

Aleinde ne’e, kompañia boot hanesan East Timor Trading Group, hanesan distributór produtu ho marka koñesidu, ne’ebé daudaun akumula atividade ekonómika balun, hapara traballadór Burger King no Discovery Inn pur volta na’in-30 ne’ebé serbisu ona iha tinan barak nia laran.

Burger king ne’e fatin rua maka taka, ida iha Aeroportu Comoro no ida maka iha Bidau inklui Discovery Inn ne’ebé daudaun sira hapara tan traballadór 14 iha tempu badak,” Inspetór ne’e haktuir.

Nia konsidera, bainhira kondisaun ne’e maka laiha mudansa, sei afeta ba setór privadu no traballadór sira.  

Inspetór ne’e refere ba dadus hosi Sevisu Rejistu Verifikasaun Emprezariál (SERVE) ne’ebé rejista kompañia 100-resin maka hetan sofrimentu durante períodu EE no COVID-19.

Liuhosi inspesaun, IGT mós deteta, situasaun grave barak liu maka vistu autorizasaun traballu no seguransa saúde traballu.

“Ezemplu kuandu ita haree iha konstrusaun estrada no ponte, dala barak sira la uza ekipamentu protesesaun ba traballadór sira,” nia fó hanoin..

Nune’e mós, durante períodu EE, IGT nota katak iha infrasaun balun iha direitu traballadór sira.

“Ita haree liuliu ligasaun ho saláriu no nota katak situasaun atuál halo ekonomia kompañia kuaze monu hotu, balun atrazu selu saláriu no balun atu hapara traballadór,” nia akresenta.

Entertantu, durante implementasaun EE ligadu ho situasaun COVID-19,  Inspesaun Jerál ne’e halo ona vizita ba kompañia hamutuk 800.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here