Vice-Ministru Administrasaun Estatal, Lino de Jesus Torezao. Imajen/Antonia Maia Gusmao

DILI, 22 outubru 2020 (TATOLI)—Governu liuhosi Prezidente Grupu Tékniku Interministerial (GTI) Ministériu Administrasaun Estatál (MAE), Lino de Jesus Torezão, informa daudaun ne’e Grupu Téknikal Interministeriál seidauk bele anúnsia rezultadu ezame ba kandidatu Administradór no Prezidente Autoridade sira hosi Munisípiu Baucau, Lautém no Viqueque tanba sei halo apresiasaun rezultadu ezame no sei submete ba Konsellu Ministru (KM).

Notísia Relevante:Semana ne’e, MAE konklui ona rezultadu ezame kandidatu prezidente autoridade

“Ita sei halo apresiasaun ba rezultadu ezame hosi munisípiu tolu hanesan Baucau, Lautém no Viqueque. Maibé agora konsellu kosultivu munisipál sei halo tan apresiasaun iha kraik depois haruka fali ba MAE no sei lori fali ba Konsellu Ministru (KM),” Lino de Jesus Torezão haktuir ba Agência TATOLI iha nia knaar fatin Colmera, Dili, foin lalais ne’e.

Atuál Vise-Ministru MAE ne’e hateten, Konsellu Minsitru mak sei deside no eskolla katak sé mak sai Prezidente Autoridade no Administradór ba munisípiu tolu refere.

“To’o agora seidauk fó sai rezultadu maske ezame ba faze daruak nian ba Munisípiu Aileu no Ainaro nia hala’o tiha ona, tanba ita seidauk halo apresiasaun ba grupu tékniku interministeriál. Parese segunda semana oin konvida sira para halo apresiasaun ba sira. Parese, iha fulan novembru tinan ne’e, ita bele fó sai ona rezultadu kandidatu Administraddór no Prezidente Autoridade ba Munisípiu Buacau, Lautém no Viqueque,” nia hateten.

Entretantu, nia hateten Munisípiu Aileu no Ainaro nian ne’e, Governu realiza ona ezame iha loron 15 outubru ba kandidatu hamutuk na’in 19 kompostu hosi Aileu na’in-11 no Ainaro na’in-ualu (8) ne’e, korresaun ba sira-nia materia ezame mós ramata ona.

Aleinde ne’e, nia informa, iha Munisípiu Covalima ne’e iha kandidatura hamutuk na’in-16 mak hein hela atu ezame iha 28 outubru. Tuir planu, nia dehan, anunsiu rezutadu ezame ne’e sei tuir prosesu lubuk ida hafoin fó rezultadu ba públiku maibé sei fó rezultadu faze pur faze tanba kada munisípiu tuir ezame la hanesan.

Etapa tuir mai, nia informa, Ministériu Administrasaun Estatál sei loke konkursu vaga ba Administradór no Prezidente Autoridade ba munisípiu sira seluk ne’ebé seidauk aplika no tuir ezame.

Notisia Relevante: MAE rejeita informasaun administradór munisipál hosi partidu

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here