Edifisíu MNEK. Imajen/Espesiál

DILI, 22 outubru 2020 (TATOLI) – Governu Timor-Leste liuhosi Ministériu Negósiu Estranjeiru no Kooperasaun (MNEK), Ministériu Administrasaun Estatál (MAE), Ministériu Finansas (MF), Ministériu Justisa (MJ), inklui mós ho Tribunál Rekursu, Komisaun Anti- Korrupsaun (CAC-sigla Portugés), Prokuradoria Jerál Repúblika, Uniaun Europeia (UE) iha Timor – Leste no parseiru relevante sira seluk hala’o “Steering Committee Meeting” hodi bele halo abordajen ba progresu hosi implementasaun ba kooperasaun entre Timor – Leste ho UE.

Sorumutuk ne’e, prezide hosi Vise Ministru MNEK, Julião da Silva no Embaixadór UE iha Timor – Leste, Andrew Jacobs. Iha ne’ebé serimónia ne’e ba dala rua ona hosi komité diresaun boa governasaun.

Objetivu prinsipál ba reuniaun ne’e, komité diresaun ne’e atu monitoriza no avalia atividade sira enkuadra iha projetu sira kona-ba jestaun no supervizaun Finansas Públika deskonsentrasaun no desentralizasaun ne’ebé hetan apoiu hosi UE.

Embaixadór UE, Andrew Jacobs hateten, UE kontinua apoiu Timor – Leste hodi aselera kreximentu ekonomia sustentavel hodi halo melloria servisu hotu ba sidadaun sira iha nasaun ne’e.

“Agora ita haree dezafiu signifikativu liu-liu iha pandemia Covid-19 nian ne’e. Entaun Uniaun Europeia sei apoiu Timor – Leste iha save sira hanesan jestaun finanseira no desentralizasaun,” Andrew hateten ba jornalista sira iha edifísiu Ministériu Finansas, Dili, kinta ne’e.

Nia dehan, UE kontente tebes hala’o parseria ho governu Timor – Leste. Tanba ne’e sira kontente ho sistema governu nian hodi sira selu osan diretamente ba governu.

Orsamentu hirak ne’ebé UE apoiu ba Timor – Leste hodi implementa programa sira hanesan desentralizasaun, mellora iha Finansas Públika, nutrisaun no seluk tan, hamutuk milloens $7.6.

“Uniaun Europeia fó apoiu Timor – Leste atu aselera kreximentu ekonómiku sustentável, halo melloria ba prestasaun servisu sira no halo melloria ba meiu subsisténsia sira hosi sidadaun sira iha Timor – Leste,” nia dehan.

Vise MNEK Julião da Silva hateten, reuniaun ne’e halo kada tinan hodi haree fila fali atinjimentu sira ne’ebé UE ajuda Timor – Leste to’o ona iha ne’ebé.

“Reuniaun ne’e halo kada tinan hodi hare ba atinjimentu saida mai iha ona hosi orsamentu sira ne’ebé Uniaun Europeia fó mai ita, ba governu, ba ita nia sosiedade sivíl sira. Tanba ne’e mak ohin hamutuk hodi haree no halo diskusaun,” Julião hateten.

Iha époka ida ne’e hare liu ba asuntu rua ne’ebé importante liu atu husu apoiu ba UE kona ba deskonsentrasaun no desentralizasaun nune’e bele aselera lalais polítika governu nian.

“Espera katak iha reuniaun ida ne’e, Uniaun Europeia bele hetan informasaun mais sufisiente para apoiu nafatin governu,” Vise MNEK Julião da Silva hateten.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here