Prezidente Autoridade Munisípal Dili, Gaspar Soares. Imajen/Tatoli

DILI, 22 outubru 2020 (TATOLI)–Prezidente Autoridade Munisípiu Dili, Gaspar Soares, hateten funsionáriu Administrasaun Munisípiu Dili (AMD) liuliu pesoál saneamentu, jestaun merkadoria inklui pesoál rekolla lixu sira merese atu simu suplementu remuneratóriu ba funsionáriu AMD liña frente ne’ebé presta servisu iha ámbitu Estadu Emerj’ensia (EE) hakait ba propagasaun surtu COVID-19.

Notisia Relevante: Suplementu remuneratóriu ba liña frente konklui hotu ona

“Ha’u dehan ba funsionáriu AMD sira katak sira merese simu suplementu remuneratóriu no hein katak iha tempu badak sira bele hetan sira-nia direitu hanesan ho pesoál liña frente sira seluk hanesan polísia, pesoál saúde sira, jornalista no seluk tan,” Gaspar Soares hato’o kestaun ne’e ba Agência TATOLI iha nia knaar fatin Matadouro, Dili, kuarta ne’e.

Nia hateten, nu’udar Prezidente Autoridade iha responsabilidade para oinsá bele haree kestaun hirak ne’e tanba nia garante katak funsionáriu hirak ne’e sei simu suplementu remuneratóriu tanba osan sei prosesa hela iha Ministériu Finansa (MF).

Nia haktuir, pesoál água no saneamentu, jestaun merkadória inklui ho pesoál rekolla lixu sira-ne’e iha direitu tanba liuhosi Governu liuliu Konsellu Fundu COVID-19 ne’ebé lideradu hosi Ministériu Finansa katak suplementu remuneratóriu ba dunsionáriu liña frende ne’e kada loron ida $5.

“Ita-nia funsionáriu sira ne’e iha direitu hodi simu subsídiu tanba pandemia COVID-19 ne’e sira kontinua servisu hahú hosi Estadu Emerjénsia dahuluk to’o agora maske funsionáriu hosi instituisaun Estadu seluk deskansa no halo servisu iha uma de’it,” nia haktuir.

Tanba, nia dehan, durante ne’e funsionáriu hirak ne’e sakrifika sira-nia aan iha tempu Estadu Emerjénsia ba surtu COVID-19 tanba dalaruma transporte laiha mós sira tenke la’o ain hosi uma to’o iha servisu fatin hodi hala’o servisu.

Entretantu, Xefe Deparatamentu Saneamentu Munisípiu Dili, Domingos dos Santos Soriano, relata dadus katak totál funsionáriu AMD nian ne’ebé naran tama iha lista subsídiu hamutuk ema na’in-435 ne’ebé kompostu hosi ekipa saneamentu hamutuk na’in-206, pesoál rekolla lixu ema na’in-140 jestaun merkória na’in-89.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here