DILI, 22 outubru 2020 (TATOLI) – Klube Boavista FC Timor no Assalam FC iha oportunidade hodi buka terseiru lugar iha kopa Federasaun Futeból Timor – Leste (FFTL), epoka ne’e.
Notísia Relevante : Kopa FFTL, mellor jogadór, markadór no guarda rede di’ak liu simu $1,000,00
Jogu ba ekipa rua sei hala’o iha Estádiu Munisipál Dili, sábadu (24/10) hodi hadau malu terseiru lugar ho prémiu valor orsamentu $7,500,00. Enkuantu ida lakon sei okupa iha kuatru lugar no sei hetan prémiu osan ho valor $2,500,00.
“Ita sei iha jogu dala rua tan ba kopa FFTL nian. Jogu rua ne’e ida hala’o iha Dili no ida hala’o iha Gleno. Iha Dili jogu ba buka terseiru lugar no kuatru lugar no joga Estádiu Café Gleno buka primeiru lugar no segundu lugar,” hateten Sekretáriu Jerál FFTL, Nelio Isaac Sarmento, iha Estádiu Dili, kuarta loraik ne’e.
Lori komisaun Kopa FFTL nia naran, Nelio Isaac Sarmento, husu ba adeptu hotu atu bele partisipa másimu iha jogu rua ne’e hodi fó suporta ba klube ida-idak hodi bele harame liután.
Jogu ba Lalenok kontra AD. SLB sei hala’o domingu (25/10), iha Estádiu Café Gleno. Iha jogu ne’e se mak manan nia mak iha direitu sai hanesan kampiaun ba kopa FFTL no iha direitu ba prémiu osan ho valor $15,000,00 no segundu lugar sei simu $1,000.00.
Jornalista : Hortencio Sanchez
Editór : Francisco Simões
