Association of Chines Enterprise, introdúz estrutura ba Primeiru-Ministru, Taur Matan Ruak, sesta (23/10), iha Palásiu Governu. Imajen/Mídia GPM

DILI, 22 outubru 2020 (TATOLI)–Estrutura foun asosiasaun xineza iha Timor-Leste, aprezenta-an ba Primeiru-Ministru (PM), Taur Matan Ruak, hafoin hili membru estrutura foun ba asosiasaun ne’e.

“Ami mai hosi asosiasaun ida ho naran Association of Chines Enterprise, hato’o de’it ba Primeiru-Ministru kona-ba ami-nia organizasaun nia serbisu, nia lala’ok, atividade, tanba foin daudaun ami halo selesaun troka membru asosiasaun,” Alexandra da Costa relata hafoin ho ekipa hasoru malu ho PM Taur, iha Palásiu Governu, kinta ne’e.

Tanba ne’e, asosiasaun presiza aprezenta estrutura foun ne’ebé foin eleitu ba Xefe Governu atu hatene karik iha oportunidade investimentu ruma, asosiasaun ne’e prontu atu partisipa iha kualkér área.

Asosiasaun xineza ne’e ninia investimentu iha área iha agrikultura , ekonomia, konstrusaun no komérsiu.

Jerente Relasaun Públika, Alexandra da Costa, hateten asosiasaun ne’e eziste kleur ona iha Timor-Leste no konsege halo projetu balun iha Timór hanesan auto-estrada, Portu Tibar, no monta liña eletrisidade iha teritóriu Timór.

“Kompañia xineza ne’e bele halo buat hotu no halo kooperasaun ho Timor-Leste. Sira halo ona projetu barak iha área oin-oin,” nia akresenta.

Biban ne’e, Xefe Governu kontente ho prezensa asosiasaun no promete katak ba futuru sei halo kooperasaun serbisu ho asosiasaun xineza.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here