Charity Fundrising & Fair. Imajen/Timor Furak

DILI, 21 outubru 2020 (TATOLI)Koordenadór Asosiasaun Arte no Kultura Timor Furak, Olívio dos Santos, informa asosiasaun ne’e hamutuk ho organizasaun Sentru Dezenvolvimentu Inkluzivu iha Timor-Leste (CDITL) sei organiza feira no konsertu hodi halo angariasaun fundu, nune’e bele tulun ema ho difisiénsia, promove joven talentu no sosiedade inkluzivu.

“Eventu ne’e nia objetivu atu promove inkluzaun sosiál ba asesibilidade edifísiu iha Hera tanba difisiénsia fíziku ho
kursi roda labele asesu,” Koordenadór asosiasaun ne’e relata, iha Timor Plaza, kuarta ne’e.

Eventu hanaran ‘Charity Fundrising & Fair’ ne’e sei realiza iha sábadu (24/10) iha Centre Court Timor Plaza, hahú tuku 12:00 to’o 17:00 no sei envolve joven talentu hanesan Juju and Friend, Alkatraz, Ofelia, Alda, Ovid-16, Life Colours, Bepi no seluk tan, ne’ebé sei diverte ho feira artezenatu, dansa, teatru, poema, fashion show no múzika.

Atividade divertimentu ne’e sei inklui ema ho difisiénsia,  tanba haree durante ne’e sira ladún hetan asesibilidade iha atividade sira.

“Ami haree mínimu tebes hosi parte Governu no setór privadu atu fó espasu ba ema ho difisiénsia iha palku divertimentu no arte, tanba ne’e ami grupu arte hakarak hahú eventu ida ho kualkér eventu arte no kutura hodi inklui ema ho difisiénsia tanba tenke hahú promove sira iha kualkér atividade sosiál, nune’e hatudu katak sira mós bele, se ita bele sira mós bele,” nia akresenta.

Fundu ne’ebé sei hetan hosi atividade ne’e sei fó mós oportunidade ba ema ho difisiénsia sira atu inklui iha atividade oinoin.

Iha fatin hanesan, Diretur Ezekutivu CDITL, Martinho Guterres, hateten agriasaun fundu hosi atividade ne’e sei hatan ba nesesidade hanesan kria asesibilidade inklui haris fatin no fasilidade asesível seluk, nune’e bele fasilita maluk ho difisiénsia sira.

“Durante ne’e, ami la hetan oportunidade no ha’u hanoin hanesan ema difisiénsia barak sente deskriminadu, marjinalizadu no estagnadu ho liafuan ne’ebé maka sempre ofende,” nia akresenta.

Tanba ne’e, Martinho Guterres konsidera eventu ne’e importante tebes atu fó ezemplu ba sosiedade no promove sosiedade inkluzivu.

“Animasaun hanesan ne’e ami hetan ona maibé dala barak ami maka promove ami-nia an ka partisipa konvite tanba konsiderasaun hosi entidade ruma,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here