Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/Egas Cristovão

DILI, 21 outubru 2020 (TATOLI)—Ministru Prezidénsia Konsellu Ministru, Fidelis Manuel Leite Magalhães, aprezenta projetu proposta lei no hetan ona aprovasaun kona-ba kriasaun Orden Advogadu Timor-Leste (OATL) inklui ninia estatutu.

Ministru Prezidénsia Konsellu Ministru, Fidelis Manuel Leite Magalhães, hateten diploma ne’ebé hetan aprovasaun ne’e aprezenta hosi Ministru Justisa, Manuel Cárceres da Costa.

“Orden Advogadu Timor-Leste ne’e sei hanesan asosiasaun públika ne’ebé reprezenta advogadu no advogadu estajiáriu Timor-Leste sira, ho personalidade jurídika no la sujeita ba poder orientasaun órgaun Estadu ka kualkér pesoál koletiva públika ka privada, independente no autónoma iha realizasaun ba ninia objetivu sira,” Ministru Prezidénsia Konsellu Ministru, Fidelis Manuel Leite Magalhães informa hafoin ramata reuniaun ezekutivu, kuarta ne’e.

Portavós Governu ne’e hatutan, poder sira ne’e tutela legalidade kona-ba OATL ne’ebé prevee iha rejime jurídiku asosiasaun públika profisionál sira maka ezerse hosi Ministru Justisa.

Membru Ezekutivu ne’e subliña, atribuisaun tarefa OATL inklui ona ho responsabilidade ba atribuisaun títulu profisionál advogadu no advogadu estajiáriu, nune’e regula ezersísiu ba ninia profisaun.

OATL sei defende direitu no interese ba membru sira, promove formasaun, atualizasaun no hasa’e profisionál no kontribui ba interkámbiu, kolaborasaun no kooperasaun ho instituisaun sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here