Governu realiza retiru ba preparasaun diskusaun OJE 2021, kuarta(21/10), iha auditóriu MF, Aitarak-laran. Imajen Tatoli/Egas Cristovão

DILI, 21 outubru 2020 (TATOLI)—VIII Governu Konstitusionál lideradu hosi Primeiru-Ministru (PM), Taur Matan Ruak, hamutuk ho membru sira no ekipa tékniku kada ministériu, realiza retiru iha kuarta ne’e ba preparasaun debate proposta Orsamentu Jerál Estadu (OJE) 2021 iha Parlamentu Nasionál (PN).

Tuir nota ofisiál ne’ebé Agência Tatoli asesu, retiru ne’ebé realiza iha auditóriu Ministériu Finansa (MF), Aitarak-laran, membru Governu sira analiza alterasaun ba métodu aprezentasaun orsamentu.

Métodu foun ne’ebé sei aplika iha aprezentasaun maka orsamentu bazeia ba programa, ne’ebé hanesan ba dahuluk despeza OJE aprezenta tuir programa no utiliza klasifikasaun orgánika no ekonómika.

Forma foun ne’e permite transmite informasaun konkreta kona-ba objetivu dotasaun orsamentál inklui autór no tipu despeza.

Notísia Relevante: Reuniaun KM: fixa tetu finál proposta OJE 2021 biliaun $1,895

Governu submete ona Proposta Lei OJE 2021 ba PN

Orsamentu bazeia ba programa ho intensaun atubele iha transparénsia no halo definisaun prioridade despeza no kontribui ba responsabilidade no kontrolu, ne’ebé programa projeta atu atinje rezultadu espesífiku ba médiu no longu prazu (tinan 3 to’o 5), inklui reflete ba prestasaun servisu ne’ebé vinkula ba programa no prioridade Governu, objetivu Planu Estratéjiku Dezenvolvimentu (PED) no Objetivu Dezenvolvimentu Sustentável (ODS).

“Kada programa tenke iha indikadór rezultadu no planu ba ezekusaun, no kada programa kompostu hosi sub-programa ho rezultadu ba kurtu prazu ho ninia atividade, ne’ebé sei realiza anualmente atu prodúz rezultadu imediatu,” nota ne’e esplika.

Aleinde ne’e, orsamentu bazeia ba programa permite rasionalizasaun rekursu públiku ho korelasaun direta entre atribuisaun fundu atu determina despeza no planeamentu atividade.

Vantajen ba forma foun ne’e maka atu aumenta responsabilidade ba meta ne’ebé sei alkansa no koñesimentu rekursu nesesáriu, sai efisiénsia no efikásia liu iha medida prinsipál no fundu alokadu atu atinje objetivu konkretu no kuantifikável, redúz kustu desnesesáriu no aumentu transparénsia, permite PN no sidadaun ein jerál halo avaliasaun efetiva ba rezultadu ho karáter objetivu hosi uzu rekursu públiku.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here