Xefe Prokuradór Distritál Dili, Jacinto Babo, Komandante Polísia Munisípiu Dili, Superintendente Xefe, Henrique da Costa no Segundu Komandante, Superintendente Euclides Belo, halo entrevista ho jornalista sira. Imajen Tatoli/Eugénio Pereira

DILI, 21 outubru 2020 (TATOLI)- Prokuradór Jerál Distritál Dili (PJDD), ohin, hala’o enkontru ho Komandu Polísia Munisípiu Dili, komandante eskuadra no Polísia Servisu Investigasaun Kriminál (PSIK) hodi hala’o avaliasaun ba kooperasaun servisu atu tau matan di’ak liután ba servisu fó asisténsia ba vítima no suspeitu sira nia kazu.

Xefe Prokuradór Distritál Dili, Jacinto Babo informa, sorumutuk koordenasaun servisu ne’e halo tinan ida dala tolu para buka rezolve kazu krime sira labele pendente.

Xefe Prokuradór Distritál Dili, Jacinto Babo, Komandante Polísia Munisípiu Dili, Superintendente Xefe, Henrique da Costa no Segundu Komandante, Superintendente Euclides Belo, foto hamutuk. Imajen Tatoli/Eugénio Pereira

“Ami fahe informasaun ba malu kona-ba atividade ne’ebé mak durante ne’e ami halo, tanba Polísia Investigasaun Kriminál no Ministériu Públiku, sempre servisu hamutuk hodi haree atuasaun ba kazu sira ninia atualizasaun liga ba kazu kriminál sira ne’e oinsá para ami koordena di’ak liután ba futuru atu fó justisa ne’ebé di’ak ema hotu,” Prokuradór Jacinto Babo hateten ba jornalista iha Komandu PNTL Caicoli, Dili.

Prokuradór no PNTL kontinua servisu hamutuk hodi haree mós desizaun Tribunál kona-ba Medida Koasaun Prizaun Preventiva, Medida Koasaun Termu Identidade Rezidénsia (TIR) no Medida Koasaun Prizaun Preventiva ba autór sira.

Jacinto Babo hatutan, dala ruma autór krime balun nia kazu to’o Tribunál fó medida koasaun Termu Identidade Rezidénsia (TIR) no PNTL maka tenke halo akompañamentu hodi autór sira hodi kumpre didi’ak desizaun Tribunál nian.

“Ita husu polisia investigasaun atu kontrola didi’ak se ema sira ne’ebé la kumpre aprezentasaun periódika, ida ne’e mós konsekuénsia ida tuir medida koasaun ida ne’ebé tribunál aplika (ba autór) ba primeiru interrogatóriu,” nia hateten.

Durante ne’e, Prokuradór Distritál Dili mós rejistu kazu krime oin-oin to’o 300-resin ne’ebé kazu balun prosesa ona ba Tribunál no balun sei pendente hela.

Iha fatin hanesan, Komandante Polísia Munisipiu Dili, Superintendente Xefe, Henrique da Costa, hateten, enkontru koordenasaun ne’e importante hodi hadi;’a fallansu servisu sira hodi fó susesu ba servisu hotu- hotu.

Henrique dehan, kuaze loro-loron PNTL simu keixa ho kazu oin-oin, dala ruma parte investigasaun kriminál sira halo investigasaun hasoru mós dezafiu oin-oin presiza halo koordenasaun ho prokuradór hodi fó apoiu ba servisu PNTL nian.

Durante trimestre daruak, jullu-setembru, tinan  ne’e, Polisia Munisipiu Dili rejista kazu krime hamutuk 445 ne’ebé komete hosi Timoroan sira. Kazu hirak ne’ebé domina maioria ofensa integridade fízika hamutuk 155, violénsia doméstika 47 no kazu seluk tan.

Nia hatutan, PNTL mós ba futuru sei aumenta tan ekipa investigadór sira iha eskuadra PNTL Dili, Kristu Rei, Don Aleixo, Vera Krús, Metinaro, Nain Feto no Atauru nian.

Notísia Relevante : PNTL Dili rejista kazu 445

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here