Moras matan.Ilustrasaun

DILI, 21 outubru 2020 (TATOLI)Ospitál Referál Suai Munisípiu Covalima, durante fulan sia hahú janeiru to’o setembru 2020 ne’e fó ona tratamentu ba pasiente moras matan ka optalmoloji hamutuk 702 ho tipu haat maka katarata, Pterígiu, Conjuntivite no refrakasi error ka erru reforma.

Enfermeiru Matan, Bernadino Pires, relata pasiente 702 ne’e kompostu husi feto 342 no mane 360.

Notísia Relevante:Durante fulan rua, SNM atende pasiente matan rihun 3-resin

”Pasiente ida ne’ebé  mak bolu refrakasi error ka erru ba reforma ne’e  mak hanesan ema ne’ebé mak haree husi dook ka besik la moos, feto hamutuk 199 mane 146  ho idade 35 ba leten depois pasiente katarata feto 49  mane 79   ne’e idade 50 ba leten,’’ Bernadino Pires, dehan ba Tatoli, via telefone, kuarta ne’e.

Aleinde ne’e, nia hatutan pasiente matan ho tipu konjuntivite ka Conjunctivitis hamutuk feto 18 no mane 22, no ikus liu maka pasiente matan ho tipu pteríjiu ka Pterygium feto 45 no mane 26.

“Moras haat nia tratamentu mak dahuluk mak refrakasi error ne’e oferese oklu ba sira depois moras katarata ne’e halo operasaun depois pteríjiu ne’e mós hanesan halo operasaun depois oferese oklu metan, Konjuntivite ne’e fó ai-moruk matan nian hodi sira bele rekupera,’’ nia hateten.

Tuir nia daudaun ne’e ekipamentu Retinoscope atu halo tratamentu ba matan, aat ona no lori ona ba saúde nasionál hodi halo manutensaun.

Kauza husi moras matan katarata afeta mós husi moras diabetes no kostume fuma, moras matan konjuntivite maihosi infesaun virus iha matan, moras matan pteríjiu dalabarak liu sofre husi ema ne’ebé halo servisu barak liu iha liur tanba halo interasaun direta ho loro manas.

Notísia Relevante:MS lansa planu estratéjiku saúde matan

Jornalista :Felicidade Ximenes

Editór:Agapito dos Santos

HAKEREK NO HATÁN

Please enter your comment!
Please enter your name here