Ministru Justisa (MJ), Manuel Cárceres da Costa, tersa ne’e, prezide reuniaun Konsellu Koordenasaun Justisa (KKJ) iha edifísiu Ministériu Justisa, Caicoli, Dili, tersa (20/10/2020). Imajen/Mídia MJ

DILI, 21 outubru 2020 (TATOLI)-Ministru Justisa (MJ), Manuel Cárceres da Costa, tersa ne’e, prezide reuniaun Konsellu Koordenasaun Justisa (KKJ) iha edifísiu Ministériu Justisa, Caicoli, Dili,  hodi informa  hikas  kona-ba estatutu foun Ministériu Públiku (MP) nian ne’ebé foin lalais hetan ona aprovasaun iha  nivel Konsellu Ministru (KM).

Membru sira  ne’ebé hola parte iha reuniaun KKJ ne’e mak hanesan  Prezidente Tribunál Rekursu, Deolindo dos Santos, Prokuradór Jerál Repúblika, José Ximenes, Defensor Públiku Jerál, Cancio Xavier, Diretor Nasionál Polísia Sientífika Investigasaun Kriminál (PCIC),Vicente Fernandes Brito no sira seluk.

Liuhosi nota komunikadu imprensa ne’ebé Agência Tatoli asesu, ohin, mensiona katak iha enkontru  KKJ ne’e mós ko’alia asuntu importante tolu; dahuluk maka  liga  prosesu diploma legal sira, liu-liu parte polítika reforma judisiáriu hanesan; Konsellu Ministru ne’ebé aprova ona orgánika  foun Ministériu Públika nian, ajenda mós atu diskute  proposta lei kriasaun orden  advogadu Timor-Leste, Proposta lei orgánika judisiáriu no mós diploma seluk.

Asuntu daruak, diskute mós kona-ba implementasaun no alargamentu Tribunál movel, ne’ebé Ministériu Justisa kontinua tau prioridade ba programa refere hodi atinje polítika asesu ba justisa.

Ikus liu membru KKJ diskute preparasaun atu halo abertura ba formasaun ba Majistradu Judisiál, Majistradu Ministériu Públiku no Defensor Públiku, konforme Dekretu-Lei no 10/2020.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here