ise Ministru Saúde, Bonifácio Maucoli dos Reis. Imajen Tatoli/Antonio Goncalves.

DILI, 21 outubru 2020 (TATOLI)—Vise ministru saúde, Bonifácio ‘Maucoli’ dos Reis apela ba ema hotu atu kontribui ba moris saudável liliu eduka família atu abitua fase liman ho sabaun iha moris lorloron.

“Husu ba hotu-hotu nia kontribuisaun atu prátika hahalok ne’ebé saudável, bainhira iha ona koñesimentu, tanba ho informasaun no mudansa hahalok mak bele lori ita ba moris saudável. Inan-aman mak sai modelu di’ak ba labarik sira oinsá hatene fase liman loloos ho sabaun. Husi ne’e mak sei kontribui ba redusaun taxa mortalidade labarik no moras oin-oin”, nia hateten ba jornalista sira durante serimonia komemorasaun loron mundiál fase liman iha Palasiu da Sinzas Caicoli, Dili.

Notísia Relevante:Timor-Leste Komemora Loron Mundiál Fase Liman Ho Sabaun

Vise ministru saúde ne’e esplika, ohin loron Timor-Leste selebra loron mundiál fase liman tinan 2020, ho tema globál “ijiene ba ema hotu” tanba mundu iha mudansa boot iha paradigma ijiéne liman, dezde mosu surtu pandemia Coronavirus ka COVID-19.

”COVID-19 lori implikasaun boot, liliu fó mai ita oportunidade osan mean atu hadi’a ita-nia koñesimentu no hahalok relasiona ho ijiéne liman,” Governante dehan.

Tanba ne’e, Vise Ministru Saúde ne’e, kontinua enkoraza  ba ema hotu atu mantein kuidadu ijiéne fase liman loloos ho sabaun hodi proteze labarik sira hosi moras oioin ne’ebé bele fó ameasa ba moris.

“Fase liman ho sabaun mak maneira simples no baratu liu atu mantein promove ijiéne liman,”nia hateten.

Entretantu, Kada tinan mundu tomak sempre selebra loron mundiál fase liman ne’ebé monu iha loron 15 fulan-outubru.

Notísia Relevante:Kampaña prevensaun fase liman, iha área rural laiha kanalizasaun bee-moos

Jornalista: Felicidade Ximenes

Editór: Agapito dos Santos

HAKEREK NO HATÁN

Please enter your comment!
Please enter your name here