Diretór Dirasaun Administrasaun Lokál, Sebastião Pereira. Imajen TATOLI/Osória Marques.

DILI, 21 outubru 2020 (TATOLI)—Tuir dekretu lei 15/2019 diploma ministeriál konjunta númeru 18/2020 hatete kompeténsia Ministériu Administrasaun Estatál (MAE) nia mak atu fornese de’it dadus ba Ministériu Solidariedade Sosiál no Inkluzaun (MSSI) hodi MSSI halo prosesu pagamentu.

Notisia Relevante: Lista reklamasaun iha ona faze preparasaun ba pagamentu

Diretór Dirasaun Administrasaun Lokál Ministériu Administrasaun Estatál (MAE), Sebastião Pereira, hateten lista reklamasaun ne’ebé mak MAE rekolla hamutuk 15.634 hosi territóru Timor-Leste, maibé hosi totál reklamasaun 12.725 ne’e MAE sei kontinua prosesu hodi submete ba MSSI no reklamante ne’ebé mak elizível atu simu ne’e hamutuk 2.909.

“Reklamante ne’ebé mak elizível ona atu simu hamutuk 2.909 no restante ami hein no kontinua halo prosesu no sei konklui. Hein katak iha fulan ne’e, ita bele submete ba MSSI hodi MSSI halo prosesu pagamentu,” Diretór Dirasaun Administrasaun Lokál, Sebastião Perreira, ba Agência TATOLI iha nia knaar fatin Colmera, Dili, kuarta ne’e.

Sebastião Perreira hateten, MSSI haruka lista tolu (3) ba MAE hanesan lista A mak ema ne’ebé mak momentu pagamentu ne’e sira reklama no hatama dokumentu kompletu.

“Iha lista A ne’e, iha mahusuk rua (2) katak ema ne’ebé rejistu iha livru suku nian ne’e, molok loron 8 maiu ka lae. Se rejista duni iha livru refere mak ita bele hatán sim ka lae. Depois iha koluna daruak xefe suku prenxe no justifika katak ema-ne’e bele simu ka lae,” nia hateten. 

Iha lista B, nia hateten, ema ne’ebé halo reklamasaun iha momentu pagamentu maibé la aprezenta dokumentu hanesan eleitorál no fixa família, Xefe suku sira tenke justifika hafoin haruka ba MAE.

“Bainhira autoridade munisipál ho xefe suku sira bele verifika tuir sira-nia dadus livru suku nian maka hein MAE define no submete ba MSSI,” nia hateten.

Iha lista E, nia informa, mak ema sira-ne’ebé mak taka sai ona no daudaun benefisiáriu atu simu subsídiu $200 ba fulan rua (2) iha 26 outubru tinan ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here