Prezidente Komisaun C (Finansa Públika), Deputada Maria Angélica Rangel. Imajen Tatoli/Egas Cristovao.

DILI, 21 outubru 2020 (TATOLI)—Komisaun C (Finansa Públika) ne’ebé  lidera hosi Deputada Maria Angélica Rangel, ohin, hahú diskute ona preprasaun atu dezeña kalendáriu diskusaun proposta-lei Orsamentu Jerál Estadu (OJE) 2021.

Notisia Relevante: Governu submete ona Proposta Lei OJE 2021 ba PN

“Ami halo tentativa atu halo aprovasaun kalendáriu diskusaun orsamentu tanba rejimentu dehan Komisaun C mak sei prepara maibé prepara balu ona, só ke ami tenke ajusta. Data loloos atu halo kalendáriu seidauk tanba Prezidente Parlamentu Nasionál seidauk baixa mai Komisaun C,” Prezidente Komisaun C (Finansa Públika), Deputada Maria Angélica Rangel, informa ba jornalista sira iha resintu Parlamentu Nasionál, kuarta ne’e.

Nia dehan, diskusaun nível Komisaun C ne’e hanesan tentativa halo kalendáriu hanesan baibain tanba komisaun refere sei orgániza panorama orsamentál ba loron rua, posibilidade hala’o munisípiu maibé depende ba desizaun koletiva hosi komisaun finansa públika ne’e.

Prezidente Komisaun C ne’e fó-sai katak atu diskute panorama orsamentál ne’e sei bolu oradór sira hosi Governu rasik hanesan na’in ba proposta-lei inklui bolu entidade parseiru sira atu fo opiniaun ba iha orsamentu 2021 nian.

“Ohin, ami seidauk halo aprovasaun kalendáriu tanba razaun fundamentál Prezidente Parlamentu Nasionál seidauk baixa orsamentu ne’e  mai iha komisaun,” nia dehan.

Iha loron 15 outubru 2020 liubá Governu liuhosi Ministériu Finansa (MF) aprezenta ona proposta-lei Orsamentu Jerál Estadu (OJE) 2021 ho montante biliaun $1.895 ba Parlamentu Nasionál (PN).

Proposta OJE 2021 hamutuk biliaun $1.895 komposta hosi saláriu no vensimentu millaun $239,26, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Dokumentasaun orsamentál sira-ne’ebé Governu aprezenta ba Parlamentu Nasionál mak hanesan livru 1 (panorama orsamentál), livru 2 (planu anuál), livru 3-A (fundu infraestrutura), livru 3-B (munisípiu sira), livru 3-C (RAEOA-ZEESM), livru 4-AB (rúbrika orsamentál), livru 5 (parseiru dezenvolvimentu) no livru 6 (fundu espesiál-FDCH).

Iha aprezentasaun proposta-lei OJE 2021 ne’e aprezenta hosi Ministra Finansa Ein-Ezersísiu atuál Vise-Ministra Finansa, Sara Lobo Brites no akompaña hosi Ministru Asuntu Parlamentár no Komunikasaun Sosiál, Francisco Jerónimo.

Tuir informasaun ne’ebé Agência TATOLI rekolla iha Parlamentu Nasionál katak proposta-lei parte legál Parlamentu Nasionál sei halo análize kona-ba regra sira hanesan sistema orsamentu, prinsípiu orsamentu no estrutura orsamentu hosi proposta-lei rasik.

Bainhira parte legál sira termina ona prosesu refere, Prezidente Parlamentu Nasionál sei lori reuniaun líder bankada hodi fixa ba plenária. Bainhira ajenda ona plenária, Prezidente Parlamentu Nasionál sei baixa kedas ba Komisaun C hodi halo kalendáriu diskusaun.

Hafoin Komisaun C aprova ona kalendáriu diskusaun sei hahú deskuti kedas iha feze audiénsia públika, faze jereralidade no faze espesialidade. Bainhira PN aprova ona iha faze espesialiadade sei halo kedas votasaun finál globál ba proposta-lei ne’e.

Bainhira PN aprova iha finál globál sei haruka fali ba Komisaun C hodi halo redasaun finál. Hafoin komisaun C termina tiha redasaun finál, Prezidente Parlamentu Nasionál sei enkamiña kedas ba Prezidente Repúblika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here