Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen Tatoli/António Gonçalves

DILI, 21 outubru 2020 (TATOLI)–Iha ámbitu reuniaun Konsellu Ministru (KM) ne’ebé prezide hosi Primeiru-Ministru (PM), Taur Matan Ruak, ezekutivu sira diskute no rona aprezentasaun hosi Ministru Administrasaun Estatál, Miguel Pereira de Carvalho, kona-ba opsaun polítika-lejizlativa relasiona ho projetu rezolusaun Governu kona-ba ezekusaun estratejia ba desentralizasaun administrativa no instalasaun órgaun reprezentativa poder lokál.

Tuir Ministru Prezidénsia Konsellu Ministru, Fidelis Manuel Leite Magalhães, projetu rezolusaun ne’e atu alkansa administrasaun ou autoridade munisipál ho estatutu ema koletiva públika, ho baze institusionál no autorkia lokál atu redefine asaun no rezultadu projetadu sira.

“Iha estratejia desentralizasaun administrativa estabelese prazu foun ba funsaun viabilidade no kapasidade ezekusaun asaun,” Ministru Fidelis relata hafoin ramata reeuniaun ezekutivu, kuarta ne’e.

Portavóz Governu ne’e dehan, opsaun ne’e alastra ho previzaun ida to’o fin mandatu VIII Governu Konstitusionál, ne’ebé mak sei termina iha tinan 2023.

Maski nune’e, aprezentasaun ne’e seidauk iha desizaun no sei aprezenta iha reuniaun KM tuir mai.

“Tanba ne’e Ministériu Administrasaun Estatál (MAE) aprezenta opsaun polítika-lejizlativa no tempu tuir mai MAE sei konvoka reuniaun ida ho ministériu relevante sira kona-ba desentralizasaun, hafoin aprezenta filafali ba komisaun koordenasaun reforma sira atubele halo analiza kle’an molok lori fali ba Konsellu Ministru transforma sai rezolusaun Governu,” governante ne’e esplika.

Nia hatutan, asaun ne’ebé halo tuir tempu no Governu atu aselera prosesu, nune’e bainhira tama iha tinan 2021 bele implementa polítika Governu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here