Premiadu Prémiu "Sérgio Vieira de Melo" 2019 na'in-lima, hasai foto hamutuk ho Prezidente Repúblika no Espoza, hafoin serimónia atribuisaun prémiu. Imajen Mídia PR

DILI, 21 outubru 2020 (TATOLI)—Prezidénsia Repúblika loke ona oportunidade  ba sidadaun no organizasaun sira atu aprezenta sira-nia kandidatura ba Prémiu Direitu Umanu “Sérgio Vieira de Mello” edisaun ba dala-13.

Komunikadu hosi Palásiu Prezidensiál Nicolau Lobato, Díli, kuarta ne’e hateten, sidadaun no organizasaun sira ne’ebé dedika nia-an ba promosaun, protesaun no divulgasaun direitu umanu iha Timor-Leste bele aprezenta sira-nia kandidatura husi loron 19 outubru to’o 18 novembru 2020.

Notísia Relevante:Timoroan Nain Haat no Organizasaun Ida Manán Prémiu Direitu Umanu

Anualmente Prezidente Repúblika atribui Prémiu Direitu Umanu “Sérgio Vieira de Mello” iha 10 dezembru, Loron Internasionál ba Deklarasaun Universal Direitu Umanu, nu’udár rekoñesimentu Estadu nian ba kontribuisaun hosi sidadaun Timoroan ka estanjeiru, organizasaun governamentál no naun-governamentál sira ba promosaun, protesaun no divulgasaun Direitu Umanu iha Timor-Leste.

Sidadaun no organizasaun sira ne’ebé promove, proteze no divulga direitu umanu bele aprezenta  ninia kandidatura hodi manán prémiu ne’e ho valór osan US $ 10.000 ba manán-na’in iha kategoria ida-idak.

Prémiu Direitu Umanu sei fahe ba kategoria Direitu Sivíl no Polítiku ba individu ka organizasaun sira ne’ebé sai defensór ba direitu umanu no Direitu Sosiál, Ekonómiku no Kulturál ba individu ka organizasaun sira ne’ebé dedika nia-an ba promosaun atividade direitu umanu  iha área Direitu Sosiál, Ekonómiku no kulturál, nomeadamente ba kombate pobreza, edukasaun, saúde, protesaun meiu ambiente no solidariedade sosiál.

Kritériu ba aprezentasaun kandidatura  mak individu labele kandidata-an rasik, kada proponente bele aprezenta kandidatura ida de’it, ema ka instituisaun ne’ebé manán tiha ona prémiu ne’e iha tinan-5 kotuk labele sai kandidatu, aprezentasaun kandidatura hakerek iha lian tetun ka portugés.

Prémiu Direitu Umanu “Sergio Vieira de Mello”, hari’i husi Dekretu-Lei númeru 15/2009, 18 marsu, atribui husi Prezidente Repúblika, ho objetivu destaka atividade sidadaun Timoroan no rai-li’ur, organizasaun governamentál no naun governamentál iha promosaun, defeza no divulgasaun Direitu Umanu iha Timor-Leste.

Iha tinan-2019, Xefe Estadu atribui Prémiu Direitu Umanu “Sergio Vieira de Mello” ba manan-na’in ho kategoria Direitu Sosiál, Ekonómiku no Kulturál ba José Amaral Guterres, Marcelina dos Santos Cruz no Organizasaun Konservasaun Flora no Fauna (KFF). Manan-na’in ba kategoria Direitu Sivíl no Polítiku mak José Luís de Oliveira no Virgílio da Silva Guterres “Lamukan”.

Notísia Relevante:“Prémiu ne’e Halo Ha’u Ta’uk Reforma Lalais”

Jornalista: Cipriano Colo

Editór: Agapito dos Santos

HAKEREK NO HATÁN

Please enter your comment!
Please enter your name here