Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 21 outubru 2020 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur, ohin, hala’o enkontru ho Prezidente Repúblika nu’udar mós Komandante Supremu Forsa Armada,  Francisco Guterres “Lú-Olo” hodi introdús programa  Komandu F-FDTL kona-ba ezersísiu “Cobra20-2” tinan 2020  ne’ebé konsentra iha Suku Nunira, Postu Administrativu Laga, Munisípiu Baucau.

Notísia Relevante : Ezersísiu “Cobra20-2” orienta forsa haklaken dame

“Agora forsa sira halo ezersísiu “Cobra20-2” ne’ebé halo iha área Laga nian hanesan misaun militár nian hodi lori forsa besik liután ba povu sira,” Lere hateten ba jornalista, hafoin enkontru ho Prezidente Repúblika, Francisco Guterres “Lú-Olo” iha Palásiu Prezidensiál, Dili.

Abertura ba ezersísiu “Cobra20-2” ne’e hala’o ona iha segunda (19/10), ne’ebé envolve forsa kompañia ida, kompostu hosi Komponente Terrestre, Navál, Sentru Formasaun Terrenu, Komponente Apoiu Servisu, Polísia Militár no Kuartél Jenerál.

Ezersísiu ne’e halo ho objetivu atu lori dame ba povu Nunira sira, tanba konflitu organizasaun Arte Marsiál, foin lalais, akontese iha area refere hosi halo povu lakon uma no moris la hakmatek.

“Prezidente nu’udar Komandante Supremu Forsa Armada nia hateten, forsa tenke halo ezersísiu hodi manan nafatin espíritu militár no manan konfiansa povu nian,” Lere haktuir.

Lere dehan, forsa F-FDTL sira ne’e sei halibur mós grupu juventude no grupu organizasaun Arte Marsiál atu kria dame hodi moris hakmatek ba povu.

Iha enkontru ne’e, Lere Anan Timur informa mós situasaun seguransa iha Timor-Leste la’o di’ak nafatin no servisu F-FDTL ho PNTL mós halo kontrolu maka’as iha liña fronteira terrestre no tasi.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here