Xefe Estadu Maiór F-FDTL, Majór Jenerál Lere Anan Timur. Imajen Tatoli/Egas Cristovão

DILI, 21 outubru 2020 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur, husu ba membru Konsellu Seguransa Estadu atu hala’o enkontru hodi tetu didi’ak desizaun atu fó pistola ba Polísia Sientífika  Investigasaun Kriminál (PCIC).

Notísia Relevante :  Governu Desidi Sosa Pistola Ba PCIC

Lere dehan, lei defeza no seguransa nasionál iha Konstituisaun RDTL define klaru ona katak, instituisaun F-FDTL no instituisaun PNTL maka bele lori kilat.

“Ita sosa kilat ne’e ita tenke kontrola, labele sosa arbiru kilat, agora tuir Konstituisaun RDTL dehan katak, F-FDTL no PNTL maka iha direitu autorizadu kaer kilat, instituisaun sira seluk la iha. Porezemplu, se PCIC ne’ebé dehan agora iha kilat ne’e ha’u dehan la’o sala. podia PCIC ne’e iha PNTL nia okos, para komandu polísia maka fó kilat ba sira,” Lere afirma hodi responde jornalista, ohin, iha Palásiu Prezidensiál, Dili.

Lere rona informasaun katak, pistola hamutuk 50 ho marka caliber 9×99 mm ne’ebé Ministériu Justisa sosa to’o ona Timor-Leste tenke haree se maka iha responsabilidade atu rai kilat.

Notísia Relevante : Ministru Defeza Husu Tetu Didi’ak Sosa Pistola Ba PCIC

 “Ha’u la konkorda Timor idak-idak sosa kilat tuir nia hakarak,” Lere hateten ho hirus uitoan.

Komandante F-FDTL ne’e preokupa, militár sira ne’ebé treinadu de’it kaer kilat dala ruma sei tiru arbiru, sa tan governu sosa kilat ba ema sivíl fó ameasa ba seguransa iha futuru.

Too notísia ne’e hatún parte Governu Timor-Leste liuhosi Ministériu Justisa seidauk fó deklarasaun ruma kona-ba kilat ne’ebé Governu Timor-Leste sosa ona PCIC.

Governu liuhosi reuniaun Konsellu Ministru iha tinan kotuk aprova pedidu sosa pistola ne’e tuir Dekretu-Lei númeru 15/2014 ne’ebé altera ba lei númeru 21/2014 kona-ba lei orgánika PCIC iha artigu 20 hateten, PCIC bele uza no lori kilat bainhira halo investigasaun kriminál.

Notísia Relevante : Governu Sosa Uluk Pistola 50 ba PCIC

Alende ne’e, pistola hira ne’e, Ministériu Justisa maka sei define tuir diploma ministeriál númeru 33/2017 ne’ebé hetan ona aprovasaun katak, pistola ne’ebé PCIC atu lori ne’e ki’ik.

Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here