Magnífiku Reitór Universidade da Paz (UNPAZ), Adolmando Amaral. Imajen Tatoli/Eugénio Pereira

DILI, 21 outubru 2020 (TATOLI)—Magnífiku Reitór Universidade da Paz (UNPAZ) no Institute Of Bussines (IOB), deklara sira nia protidaun atu simu estudante destakadu husi rejime hakbi’it  ka oan ki’ak ne’ebé la konsege akumula hotu iha Universidade Nasionál Timor Lorosa’e (UNTL) no Institutu Politékniku Betano (IPB) iha tinan letivu 2020.

Ministériu Ensinu Superiór Siénsia no Kultura iha tinan ne’e deside ona vaga hamutuk 910 ba oan ki’ak sira atu asesu UNTL no IPB maibé, UNTL no IPB sei akumula de’it 510 no 400 tenki koloka ba universidade privada sira iha rai-laran.

Notísia Relevante:Governu deside ona totál vaga 910 ba oan ki’ak asesu UNTL

“Ami apoiu polítika Ministériu nian hodi fó mós oportunidade rejime espeisál ba Universidade ka instituisaun ensinu superiór privada sira. Se karik UNPAZ mós hetan ami prontu simu estudante rejime espesiál sira ne’e hodi forma sira tuir kuríkulu ne’ebé mak ami iha,” Reitór UNPAZ Adolmando Amaral hateten asuntu ne’e ba Tatoli via telefone, kuarta ne’e.

Mezmu nune’e, maibé Adolmando dehan to’o oras ne’e nia parte seidauk halo diskusaun ho Ministériu Ensinu Superiór Siénsia no Kultura kona-ba asuntu ne’e rasik.

Reitór IOB, Augusto Soares. Foto: Portal IOB

Iha parte seluk, via telefone ohin, Reitór IOB, Augostu da Conceição Soares  dehan husi parte IOB mós prontu kolabora no apoiu programa Governu nian ne’e atu prepara rekursu umanu ho kualidade ba apoiu dezenvolvimentu.

Notísia Relevante:Asesu UNTL, MAKLN propoin vaga ba veteranu nia-oan 1.300

Jornalista : Tomé Amado

Editór :Agapito dos Santos

1 KOMENTÁRIU

  1. Entaun oinsa ho sira nebe mak agora ddaun halao hela studu iha unpaz mak inan ka aman mate ona,, entaun oinsa ho governo nia hare kona ba sira nee… Obrigado Husi Estudante Unpaz

HAKEREK NO HATÁN

Please enter your comment!
Please enter your name here