Estadu Emerjénsia iha Timor-Leste. Imajen/Portál Governu

DILI, 21 outubru 2020 (TATOLI)Governu liuhosi reuniaun Konsellu Ministru (KM), delibera atu propoin ba Prezidente Repúblika, Francisco Guterres ‘Lú Olo’, atu halo renovasaun Estadu Emerjénsia (EE) dahitu ba loron-30.

Ministru Prezidénsia Konsellu Ministru, Fidelis Manuel Leite Magalhães, hateten Governu deside husu filafali Xefe Estadu halo estensaun EE ba fulan oin maski seidauk ramata, tanba atu asegura tempu.

“Reuniaun hirak ne’ebé sei halo, bele halo ho tempu tanba prevee ona katak Estadu Emerjénsia daneen agora sei vigór hela no sei ramata iha loron 03 novembru tuku 23:59, maibé tanba semana oin iha atividade barak inklui mós loron finadu, maka Governu deside sedu atu fó tempu ba órgaun soberania sira halo kalendáriu hodi konvoka reuniaun hirak ne’ebé nesesáriu ho tempu,” dehan Ministru hafoin ramata reuniaun KM iha Palásiu Governu, kuarta ne’e.

Notísia Relevante: Governu propoin PR dekreta Estadu Emerjénsia ba daneen

EE daneen: sidadaun tama ilegál hosi fronteira terrestre aplika koima

Portavós Governu ne’e subliña, razaun renovasaun EE hodi atende mudansa situasaun epidemiolójika no proliferasaun kazu rejistadu kontájiu COVID-19 iha nível rejionál no mundiál atu evita no neutraliza risku propagasaun Moras ne’e.

Nune’e mós, atubele proteje saúde públika no fó kbiit ba Governu atu hatán ba Sistema Nasionál Saúde no permite atu suspende direitu sirkulasaun internasionál no fiksasaun rezidénsia no rezisténsia.

Daudaun ne’e, totál kazu konfirmadu COVID ne’ebé rejista iha Timor-Leste hamutuk na’in-29 no provável hamutuk haat, ne’ebé hosi totál ne’e ida maka sei halo tratamentu intesivu iha sala isolamentu tanba seidauk rekuperadu.

Xefe Estadu dekreta EE faze dahuluk ba loron-30, ne’ebé hahú entra ein vigór iha 28 marsu hahú oras 00:00 to’o 26 abríl 2020 oras 23:59, atu fó dalan ba Governu implementa médida espesífiku sira hodi prevene propagasaun COVID-19.

Haree ba nesesidade atu estende, Xefe Estadu promulga estensaun EE períodu daruak ho durasaun loron-30 tuir pedidu Govenu.

Nune’e, iha loron 27 abríl, Prezidente Repúblika liuhosi Dekretu Prezidensiál númeru 32/2020 promulga estensaun EE períodu daruak ho durasaun loron-30, hahú husi oras 00.00 loron 28 abríl to’o oras 23:59 27 maiu 2020.

EE ba períodu datoluk implementa iha oras 00:00 loron 28 maiu to’o oras 23:59 loron 26 juñu 2020.

Enkuantu, EE dahaat hahú hosi oras 00.00 iha loron 06 agostu 2020 to’o oras 23.59 iha loron 4 setembru 2020 durante loron 30 ba zona iha fronteira, aeroportu no portu.

EE dalimak hahú vigora hahú tuku 00:00 loron 05 setembru to’o tuku 23:59 loron 04 outubru 2020.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here