Diretór Jerál Estatístika, Elias dos Santos Ferreira, Imajen Tatoli/Egas Cristovão

DILI, 20 outubru 2020 (TATOLI)–Governu liuhosi Ministériu Finansa (MF), Diresaun Jerál Estatístika (DGE) sei realiza sensu populasaun hodi atualiza dadus ikus populasaun iha tinan 2015.

Diretór Jerál Estatístika, Elias dos Santos Ferreira, hateten sensu populasaun ne’e realiza kada tinan lima dala ida maibé iha tinan 2020 la konsege realiza tanba uza Dotasaun Orsamentu Temporáriu (DOT).

“Loloos ne’e realiza ona iha tinan 2020, maibé tanba Orsamentu Jerál Estadu la pasa iha Parlamentu Nasionál maka muda hikas ba iha tinan 2021,” Diretór Jerál informa, iha resintu edifísiu DGE, Caicoli, tersa ne’e.

Ba inisiativa ne’e, Ministériu Finansa (MF) prevee ona orsamentu iha OJE 2021 ho montante millaun $3 atu realiza sensu.

Dirijente ne’e dehan, orsamentu ba sensu populasaun kiik liu kompara ho orsamentu ba sensu agríkola 2019.

“Orsamentu kiik liu tanba fasilidade ne’ebé sei utiliza iha nanis ona momentu realizasaun sensu agríkola, entaun utiliza fali de’it fasilidade sira-ne’e,” Elias akresenta.

Nia konsidera  sensu populasaun  importante tebes tanba la’ós de’it dadus maibé demográfiku, ekonómiku no sosiál.

“Sensu populasaun ne’ebé sei realiza bele halo komparasaun ho sensu populasaun tinan 2015, tanba ho atualizadu dadus bele realiza planu sira ne’ebé Governu trasa iha polítika Governu,” nia subliña.

Enkuantu, timor-oan ne’ebé sei serbisu durante realizasaun sensu populasaun iha tinan oin hamutuk ema 3.000-resin.

Governu antes ne’e realiza ona sensu iha 2004, 2010, no ikus liu iha 2015.

Iha sensu populasaun 2015 rekruta timor-oan 5.200 atu rekolla informasaun iha terrenu no orsamentu ba atividade ne’e ho montante millaun $5, ne’ebé 75% mai hosi Governu inklui doadór no barak liu apoiu ekipamentu hanesan GPS, no laptop.

Rezultadu sensu populasaun 2015, totál populasaun Timor-Leste hamutuk 1.167.242. ne’ebé kompostu hosi mane hamutuk 588.561 no feto 578.681, kompara sensu 2010 rejista populasaun hamutuk 1.066.409, mane iha 544.198 no feto 522,.242, ne’ebé hatudu katak durante tinan lima nia laran populasaun aumenta 100.833.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here