Portavós PNTL Superintendente Xefe, Arnaldo de Araújo. Imajen Tatoli/Eugénio Pereira

DILI, 20 outubru 2020 (TATOLI)- Durante loron 13 to’o loron 19 outubru 2020, Komandu Jerál Polísia Nasionál Timor-Leste (PNTL) rejista asidente tráfegu ne’ebé akontese iha territóriu Timor-Leste hamutuk 20.

Hosi asidente tráfegu 20 ne’e rezulta vítima na’in-haat mate, maka hanesan  kazu karreta kamioneta ida ho xapa A51887 baku fila iha Suku Lore, Munisípiu Lautem rezulta vítima na’in-tolu mate fatin, na’in tolu kanek todan no na’in 8 kanek kaman.

Alende ne’e, kazu karreta kamioneta ida soke mate alin estudante ida no rezulta vítima balun kanek kaman iha área Suku Bucoli,  Postu Administrativu Baucau Vila, Munisípiu Baucau.

Portavós PNTL Superintendente Xefe Arnaldo de Araújo informa, PNTL rejista mós kazu krime kaman besik 59.

“Insidente ne’ebé mosu hamutuk 59, ne’ebé domina liu hosi kazu asalta malu no ta malu no kazu asidente tráfegu hamutuk 20 ne’ebé ita identifika tanba fatór umanu 90%, fatór karreta kondisaun la di’ak 5% no fatór dalan aat 5%,” Komandante Arnaldo hateten ba jornalista liuhosi konferénsia imprensa, ohin, iha Komandu Jerál PNTL, Caicoli, Dili.

Portavós PNTL Arnaldo de Araújo mós klarifika kazu omisídiu aman oho oan ne’ebé akontese Aldeia Labubu-Aidahu, Postu Administrativu Laclo, Munisípiu Manatuto iha fulan kotuk PNTL aprezenta ona autór nu’udar aman ho inisiál JC ne’ebé lori katana ko’a nia oan ninia kakorok to’o mate agora daudaun autór ninia kondisaun saúde rekupera ona no autór ne’e rasik PNTL aprezenta ona ba Ministériu Públiku hodi prosesa iha Tribunál.

“Kazu ne’ebé akontese iha Laclo-Manatuto, suspeitu oho ninia oan, depois lori katana ko’a fali ninia kakorok, maibé nia la mate, agora suspeitu ne’e ita aprezenta ona ba Ministériu Públiku,” portavós  PNTL ne’e informa.

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here