Prezidente Tribunál Rekursu, Deolindo dos Santos. Imajen Tatoli /Egas Cristovão

DILI, 20 outubru 2020 (TATOLI)–Prezidente Repúblika (PR), Francisco Guterres “Lú Olo”, husu ba juiz sira hotu  iha Tribunál atu kontinua hala’o servisu ho forma ne’ebé di’ak, atu nune’e lori justisa ba povu ho di’ak liután.

“Mensajen hosi Prezidente Repúblika ba juiz sira mak presiza servisu di’ak liután atu lori justisa ne’ebé la’o daudaun di’ak liután ba povu,” Prezidente Tribunál Rekursu, Deolindo dos Santos, hateten ba jornalista sira, ohin, hafoin enkontru ho PR Francisco Guterres ‘’Lú-Olo’’ iha Paláçio Prezidensiál, Bairru Pité, Dili.

PR Lú-Olo hateten, bainhira prosesu dezenvolvimentu ne’e la’o ema ne’ebé buka justisa barak no nesesidade boot liután. Tanba ne’e, Lú-Olo mós husu funsionamentu Tribunál móvel ne’ebé daudaun hala’o hosi Tribunál Distritál sira atubele lori justisa   besik liután ba komunidade.

“Ida-ne’e mak mensajen PR nian enkoraja mai ami juiz hotu iha  servisu Tribunál nian bele servisu ho forma di’ak liután,” Prezidente Tribunál Rekursu, Deolindo dos Santos tenik.

Durante enkontru ne’e, PTR Deolindo dos Santos, atualiza  mós  servisu Tribunál nian  iha fulan ne’e nia laran hafoin férias judisiál iha fulan agostu to’o mai iha  loron 15 setembru, ne’ebé daudaun hahú hala’o servisu normál hodi juis sira komesa haree prosesu tuir ida-idak nia kompeténsia no  tarefa servisu.

Deolindo dos Santos informa mós ba PR Lú-Olo, kona-ba  servisu Kámara Konta nian ba auditoria sira no preparasaun ba formasaun juiz, auditór, ofisiál no funsionáriu iha Tribunál nian  ba formasaun lei foun Medida Preventiva no Kombate Korrupsaun (MPCC) ne’ebé sei hala’o  iha loron 12 fevereiru, tinan oin.

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here