Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 20 outubru 2020 (TATOLI)— Deputada Bankada Partidu Libertasaun Populár (PLP), Maria Angelina Lopes Sarmento, konsidera katak planu balun iha rekuperasaun ekonómika seidauk oportunu tanba loloos ne’e planu normál ba tinan lima nian.

Deputada Bankada PLP ne’e fó hanoin ba Governu iha faze daruak nian kona-ba planu rekuperasaun ekonómika pós Covid-19 ba tempu naruk tanba haree ba tabela ne’ebé governu providénsia haree katak iha buat balun la’ós iha tempu opurtunu no la’ós nesesária atu implementa ka konsidera hanesan rekuperasaun ekonómika.

Tanba tuir Membru Komisaun C (Finansa Públika) ne’e nia kompreensaun katak loloos planu rekuperasaun estadu nia intervensaun atu-bele halo balansu ba ekonomia ne’ebé mak monu (queda) nune’e insentiva fali estadu ida-ne’e hamriik fali no dezenvolve ekonomia ne’e bele seguru fali ho insentivu ruma hosi estadu.

“Programa balun iha planu rekuperasaun ekonómika ne’e seidauk opurtunu hanesan abitasaun, eletrifikasaun. Ne’e loloos ne’e programa normál governu nian, ne’e faz parte planu ba tinan lima nian. Nune’e mós iha setór turizmu hanesan promove rezidénsia antiga sira ne’ebé koopera ho parseiru dezenvolvimentu”, Vise-Prezidente Parlamentu Nasionál, Maria Angelina Lopes Sarmento ne’e fó hanoin ba governu iha ámbitu debate planu rekuperasaun ekonómika, iha plenária PN, tersa ne’e.

Tuir membru parlementu e’e, loloos ne’e planu ba médiu prazu ne’e seidauk bele sai prioridade, nune’e mós iha setór edukasaun hanesan alarta númeru CAFE (Centro de Aprendizagem e Formação Escolar) ba munisípiu rua no munisípiu tolu.

“Ne’e ha’u hanoin tama iha programa normál governu nian. Sé ita-boot sira konsidera ida-ne’e parte ida hosi rekuperasaun entaun presiza define didi’ak fali tanba labele jere hodi halo balansu ba ita-nia ekonomia”, Deputada Bankada PLP ne’e fó hanoin.

Notísia relevante:Governu aprezenta medida 9 hosi planu rekuperasaun ekonómika ba PN

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here