Hahán lokál. Foto/Timor-Leste Offical Tourism Website.

DILI, 20 outubru 2020 (TATOLI)—Diretór Nasionál Asaun Eskolár (DNASE) Ministériu Edukasaun Juventude no Desportu (MEJD), Joaquim Martins, hateten alokasaun orsamentu ba programa refeisaun eskolár ne’ebé antes ne’e hanaran merenda eskolár ba estudante ensinu báziku sira, konsentra ona iha Ministériu Administrasaun Estatál (MAE) no la’ós ona iha MEJD nia okos.

Mudansa ne’e akontese baseia ba dekretu-lei númeru 3/2016 depois revoga ba dekretu-lei 9/2018, maibé iha 2017 polítika ne’e MAE liuhosi Diresaun Nasionál Finansa Munisípiu maka responsabiliza ona hodi implementa.

Notísia Relevante:MEJD muda ona naran merenda eskolár

“Ita ninia parte agora daudaun halo de’it akompañamentu inklui kriasaun ba loron efetivu no halo koordenasaun ho MAE, Ministériu Saúde hodi halo monitorizasaun no avaliasaun ba implementasaun refeisaun eskolár ne’e rasik,” Joaquim Martins, informa asuntu ne’e, ba jornalista sira iha ninia servisu fatin Ministériu Edukasaun Juventude no Desportu Vila Verde, tersa ne’e.

Tuir planu iha tinan 2021, Governu liuhosi Ministériu Administrasaun Estatál sei aumenta orsamentu ba programa ne’e ho valór $0.50 ba kada estudante kompara ho antes ne’e kada estudante $0.25 hodi sosa modo tahan no naan ba labarik sira atu konsumu lorloron.

Entretantu, eskola 1.097 ho estudante 200.996 maka sai benefisiáriu ba programa refeisaun eskolár iha territóriu ba estudante sira.

Notísia Relevante:WFP Kontinua Apoiu Governu Hadi’a Kualidade Merenda Eskolár

Jornalista : Tomé Amado

Editór :Agapito dos santos

HAKEREK NO HATÁN

Please enter your comment!
Please enter your name here