Abertura formasaun téknika operasionál ba implementasaun programa Cesta Bázika, iha CCD, tersa (20/10). Imajen/Mídia MTKI

DILI, 20 outubru 2020 (TATOLI)–Ministru Turizmu, Komérsiu no Indústria (MTKI), José Lucas do Carmo da Silva, ohin ofisiálmente loke formasaun téknika operasionál iha Sentru Konvensaun Dili (CCD, sigla portugés) ba distribuisaun Cesta Bázika.

Iha formasaun téknika ne’e, Ministru José Lucas enkoraja no motiva ekipa téknika atu serbisu ho di’ak iha implementasaun programa Governu ba kurtu prazu ne’e.

“Ekipa sira tenke serbisu ho dedikasaun, atu nune’e prosesu distribuisaun Cesta Bázika bele la’o ho di’ak,” governante ne’e dehan liuhosi nota ne’ebé Agência Tatoli asesu iha tersa ne’e.

Notísia Relevante: MTKI fasilita voucher ba programa cesta bázika

Entrteantu, seremónia ne’e partisipa hosi Vise-Ministru, Komérsiu no Indústria, Domingos Lopes Antunes, reprezentante Xefe Programa Ai-han Mundiál (WFP, digla inglés) iha Timor-Leste, Dageng Liu, kargu Xefia no funsionáriu MTKI ne’ebé maka sei tuir formasaun.

Iha implementasaun programa ne’e, lidera hosi Ministériu Koordenadór Asuntu Ekonómika (MKAE), ho koordenasaun hosi Ministériu Agrikultura no Peska (MAP), MTKI no Sekretaria Estadu Kooperativa (SEKoop).

MTKI sei responsabliza fasilita voucher, enkuantu MAP no SEKoop sei responsabliza fahe produtu Cesta Bázika ba populasaun.

Cesta Bázika ba família ho totál kustu millaun $71,5 (valór bele iha mudansa), ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál.

Apoiu ne’e sei entrega ho forma voucher, ho kompozisaun ai-han ijiene no mós ho baze per kapita dimensaun família ho preferénsia produtu nasionál iha merkadu lokál.

Tuir kalendáriu, faze distribuisaun produtu ba populasaun iha territóriu tomak sei realiza imparsiál iha semana daruak dezembru.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here