Vise Ministru Interiór Antonio Armindo akompaña hosi Komandante Jerál PNTL Komisáriu Faustino da Costa, tula deviza ba Ofisiais membru UEP iha aniversariu UEP ba dala-11 iha Kuartel UEP, Bairopite Dili, 14 agostu 2020. Imajen Tatoli/Antonio Goncalves

DILI, 20 outubru 2020 (TATOLI)-Projetu Dekretu-Lei foun kona-ba regulamentu disiplinár Polísia Nasionál Timor-Leste (PNTL) iha ona mudansa. Iha Projetu Dekretu-Lei ne’e mós fó kompeténsia ka autoridade ba Ministru Interiór halo demisaun ba membru PNTL ne’ebé “vandalizmu” bainhira simu rekomendasaun hosi komandu jerál PNTL liuhosi Konsellu Superiór.

Komandante Jerál PNTL Komisáriu Polisia, Faustino da Costa dehan, lei foun diferente tebes ho lei antigu. Lei foun ne’e  regula kualkér membru ida maka halo sala nia sei la halo tan rekursu ba tribunál, tanba Komandu Jerál foti desizaun aprezenta ba Ministru Interiór sei foti desizaun.

“Klaru direitu báziku ba ema ida-idak nian iha. Hanesan komandante distritu ida fó sansaun ba ninia membru ida. Nia (membru) sei nafatin halo rekursu mai to’o komandante jerál. Agora desizaun Komandu Jerál nian hato’o de’it rekursu ba to’o Ministru Interiór maka deside de’it no sei la ba tan tribunál,” Komisáriu Faustino da Costa, esplika hodi responde jornalista, ohin, hafoin enkontru ho komandante PNTL munisípiu sira no komandante unidade sira iha Kuartél Jerál PNTL, Caicoli, Dili.

Regulamentu ne’e hatuur regulamentu foun tuir regra estrutura PNTL lubuk ida hodi garante disiplina institusionál no professional.

Lei ne’e rasik hetan ona promulgasaun hosi Prezidente Repúblika, Francisco Guterres “Lú-Olo” no publika ona iha Jornál Repúblika iha loron 7 outubru 2020.

PNTL nia regulamentu disiplinár iha frakeza balun maski lei organiza hateten PNTL nia formasaun no disiplina idéntiku ho militár, maibé prosesu infrasaun ba membru sira ne’ebé halo infrasaun ka krime no disiplinár ne’e kontempla ba prosesu sivíl.

Iha tempu besik, Komandu Jerál PNTL sei realiza enkontru jerál ho komandante munisípiu no komandante unidade sira hodi sensibiliza lei ho ninia regulamentu foun sira molok aplika iha terrenu.

 Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here