Ministru Prezidénsia Konsellu Ministru, Fidelis Manuel Leite Magalhães. Imajen/Egas Cristovão

DILI, 20 outubru 2020 (TATOLI) — Eis Ministru Reforma Lejizlativa no Asuntu Parlamentár atuál Ministru Prezidénsia Konsellu Ministru, Fidelis Manuel Leite Magalhães halo defeza onra hasoru Deputada Bankada CNRT Veneranda Lemos katak programa kriasaun kampu serbisu rihun-60 ne’e Aliansa Mudansa ba Progresu (AMP) nian.

“Ha’u halo defeza onra ida relasiona ho intervensaun balun ohin hosi deputadu bankada CNRT nian, relasiona ho 60 mil kampu traballu ne’e la’ós na’in mak ha’u; Fidelis Magalhães, na’in mak Aliansa Mudansa ba Progresu (AMP) ne’ebé implika na’in mak CNRT”, Ministru Fidelis, hato’o defeza de onra ne’e liuhosi debate planu rekuperasaun ekonómika, iha plenária Parlamentu Nasionál, tersa ne’e.

Nia parte iha momentu AMP ne’e nu’udar Ministru Reforma Lejizlativa Asuntu Parlamentár iha devér atu fó-sai programa governu nian.

“Ha’u tenke ko’alia sai buat loos. Buat loos maka ita ba kampaña ita lori livru oan ne’e ita aprezenta ba povu tomak iha ita-nia rai katak sé ita manán hodi kaer ukun karik kria kampu traballu ho numeru 60 mil kada tinan. Sé ba mandatu tinan lima rihun-300”, nia akresenta.

Maibé Ministru Fidelis hatutan, hafoin ukun hamutuk iha AMP hatuur programa ne’ebé hato’o ba populasaun durante kampaña hodi nune’e transforma sai programa governu.

“Saida mak akontese, durante debate OJE 2020 bankada CNRT maka vota abstensaun ba proposta orsamentu, ida-ne’ebé mak kontribui fallansu koletivu atu atinje kriasaun empregu rihun 60 kada tinan”, nia dehan .

Ministru Fidelis promete sei ba fali iha 2023 hodi esplika ba povu tanbasá la konsege kria kampu traballu ne’ebé mak ita programa.

Nia argumenta, programa kriasaun kampu traballu ne’e asina hosi lideransa másimu AMP nian kompostu Xanana Gusmão, Taur Matan Ruak no José Bukar “Naimori”.

Ministru Prezidénsia Konsellu Ministru halo defeza de onra ba kestaun ne’e tanba Deputada Bankada CNRT, Veneranda Lemos, hato’o deklarasaun katak:

“Señor ministru Fidelis nia deklarasaun iha tempu liubá sei loke kampu traballu 60 mil ba timoroan sira, to’o oras ne’e ema hirak mak servisu ka hasai hodi hatama”.

Programa Oitavu Governu Konstitusionál iha périodu AMP, aprovadu iha Konsellu Ministru iha jullu 2018 maibé depois aprezentasaun iha Parlamentu Nasionál, xumbadu.

Iha programa ne’e kompostu husi pájina 134 ho konteúdu hanesan Mudansa ba Progresu no Bem-estar, Kontinua ho Dezenvolvimentu Kapitál Sosiál, Kontinua ho Dezenvolvimentu Infraestrutura, Kontinua ho Dezenvolvimentu Ekonomia, Kontinua ho Konsolidasaun Governativa inklui Boa Governasaun no Kombate ba Korrupasaun.

Iha konteúdu sira ne’e, iha pontu 4.7 pájina 85 mak ko’alia kona-ba Empregu. Katak, halo mudansa estruturál ne’ebé hakarak implementa iha ekonomia sei fó oportunidade empregu ba timor-oan. Uain-hira ekonomia ne’e aumenta daudaun no bainhira bele transforma daudaun ona setór agríkola no setór privadu, hodi dudu produtividade ne’ebé boot liu ona, hanesan mós uainhira investimentu iha edukasaun no saúde harií daudauk forsa traballu ida ne’ebé kualifikada ona, Timor-oan sira sei kontribui maka’as liután ba kresimentu ekonomia.

Uainhira ekonomia ne’e dezenvolve, maka setór servisu sei aumenta no aumenta ida ne’e korresponde ba oportunidade boot liu ba kriasaun empregu, ho perspetiva (ka hanoin) espesiál ba feto sira. No mós, bele prevé katak bain-hira Nasaun ne’e sai ekonomikamente forte liu, maka sei hamenus númeru hosi postus-de-trabalho prekáriu (katak, la estável, metin). Iha ne’e, inklui mós sira ne’ebé serbisu ho konta rasik, sira ne’ebé la-iha salariu mínimu fulan-fulan ne’ebé garantidu ona, no mós sira ne’ebé ezerse sira-nia funsaun ho nível kondisaun segurança-de-trabalho, ne’ebé ki’ik. Governu hakarak hamenus, iha tinan hirak mai ne’e, nível empregu ne’ebé la estável iha Timor-Leste.

Polítika Governu nian ba setór empregu, bele haree iha ninia programa, tanba investimentu iha setór dezenvolvimentu oioin, mak sei kontribui ba força-de-trabalho ne’ebé saudável liu no produtiva, força-de- trabalho ne’ebé edukada liu no kualifikada no, ho diversifikasaun iha produsaun nasionál, sei mosu oportunidade barak ba kriasaun empregu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here