Ema ho defisiénsia sira uainhira partisipa iha workshop kona-ba sensibilizasaun Planu Nasionál ba Ema ho Defisiénsia ba Setór Edukasaun 2020-2024, iha Salaun Infordepe, Balide Dili, 1 Otubro 2020.Imajen/António Gonçalves

DILI, 20 outubru 2020 (TATOLI)– Ema ho defisiénsia, inklui ema sira ne’ebé iha defisiénsia fíziku, mentál, intelektuál ka sensoriál ne’ebé iha interasaun ho barreira oioin (Nasaun Unida nia Konvensaun kona-ba Direitu Ema ho Defisiénsia eh NUKDED/UNCRPD; artigu 1).

Xefe Gabinete Estudu no Planeamentu Institusionál, Ministériu Solidariedade Sosiál no Inkluzaun (GEPI-MSSI), Gil da Cruz husu ba instituisaun hotu-hotu, tantu sosiedade sívil inklui governu tenke garante no halo asesibilidade ba ema ho defisiénsia sira.

“Ita halo monitorizasaun implementasaun Planu Asaun Nasionál (PAN) ne’e tenke iha asesibilidade ba ema ho defisiénsia sira ne’e oinsá. Tanba  ne’e mak ita husu ba instituisaun hotu-hotu hanesan governu tenke halo asesibilidade”, Xefe GEPI-MSSI, Gil da Cruz ba Agência TATOLI, iha nia knaar fatin MSSI Caicoli, Dili, tersa ne’e.

Tuir relatóriu, Planu Asaun Nasionál ba Ema ho Defisiénsia (2014-2018), iha Vizaun-jerál: Defisiénsia iha Timor-Leste, ne’ebé elabora bazea ba dadus publikadu husi Diretória Nasionál Estatístika Ministériu Finansa nian hatudu katak ema 48.243 ne’ebé hela iha Timór iha tipu defisiênsia nian balun. Ida ne’e husi totál ida husi ema 1.066.409 eh besik 4.6% husi populasaun.

Katak, ema ho defisiénsia fízika hamutuk 20 593, ema ho defisiénsia matan (29 488),  ema ho defisiénsia tilun (17 692),  ema ho defisiénsia intelektuál no saúde mentál ( 13 308).  Husi totál ne’e, 53% mane no 47% feto. Depois,  10.52 % iha otas entre tinan 0-19 no defisiénsia sai hetok komún iha área rurál sira.

Tuirmai, kona-ba situasaun ba ema ho defisiénsia iha, iha relatóriu ODS, Organizasaun Nasaun Unida nian (ONU), iha Sensus 2015 deskobre katak menus husi métade (44%) husi foinsa’e sira ho idade 15-24 mak hanesan defisiente ne’ebé eskola tiha ona. Ida ne’e métade taxa (87%) husi sira-nia maluk ne’ebé la ho defisiénsia.

Monografu Edukasaun nian hatudu katak foinsa’e sira  ne’ebé ho defisiénsia ne’ebé mak tama tiha ona eskola iha porsentu boot liu mak dropout (sai) duke sira-nia eskola maluk: 2/3 (66%) mak la kontinua sira-nia edukasaun sekundária, kompara ba métade (51%) husi foinsa’e sira  ne’ebé la’ós defisiente.

32% husi foinsa’e sira ho defisiénsia mak álfabetizadu (edukadu) iha pelumenus iha língua prinsipál haat sira iha Timor-Leste (Tetun, Indonézia, Portugés, ka Inglés) versus 84% husi foinsa’e sira sein defisiénsia. Foinsa’e feto sira ne’ebé ho defisiénsia mak iha taxa literasia ne’ebé menus liu (27%) duke foinsa’e mane sira ho defisiénsia (36%).

Iha parte seluk, tuir Relatóriu Mundiál kona-ba defisiénsia, 2011, prodúz husi Organizasaun Saúde Mundiál (OMS) no Banku Mundiál (BM), afirma katak besik 15% husi mundu nia populasaun moris ho tipu defisiénsia oioin. Husi númeru ida ne’e bele halo estimasaun katak ema 176.400 mak moris hela ho defisiénsia iha Timor-Leste.

Relasiona fila fali ba relatóriu Planu Asaun Nasionál ba Ema ho Defisiénsia (2014-2018) totál persentajen husi kauza defisiénsia ne’e katak kauza husi tinan (37,2%), sira seluk (24,3%), konjenitál eh defisiénsia mai husi jerasaun (12,3%), moras tempu naruk (11,0%), moras tempu badak (9,2%), konflitu (1,9%), asidente veikúlu automotor nian sira (1,1%) no asidente iha serbisu fatin (3,0%).

Ho situasaun sira ne’e, Xefe GEPI-MSSI, Gil da Cruz fó ezemplu katak entidade se de’it, bainhira konstrui uma andar ida tenke halo fatin própriu ba ema ho defisiénsia tanba sira labele utiliza eskada. Tanba ne’e, presiza iha meiu ne’ebé tenke iha kualidade ba ema ho defisiénsia atu asesu fasil.

“Ita hein katak instituisaun hotu-hotu tantu governu  tenke iha asesibilidade ba ema ho defisiénsia nia espera.

Iha oportunidade seluk, tuir Diretór Ezekutivu Asosiasaun  Defisiente Timor Leste, Cesário da Silva katak durante ne’e dezenvolvimentu nasionál liga ho asesibilidade fíziku ladún fó fatin ba ema ho defisiénsia tanba bainhira ema ho defisiénsia asesu ka partisipa ba semináriu ruma, labele, tanba kauza hosi kondisaun no ambiente ne’ebé la fó espasu ba ema ho defisiénsia sira.

Iha konstituisaun Repúblika Demokrátika Timor-Leste (RDTL) deskreve katak Sidadaun defisiente sira iha direitu ne’ebé hanesan no sai sujeitu ba kna’ar husi sidadaun sira seluk nian, no la iha sidadaun ida mak bele hetan diskriminasaun kontra ho razaun kondisaun fízika ka mentál, tuir fornese ona iha parágrafu 1 husi artigu 21, no parágrafu 2 artigu 16 nian.

Nune’e mós, tuir meta ODS (Objetivu Dezenvolvimentu Sustentável), ONU, ne’ebé nasaun barak adota inklui Timor-Leste (TL), iha pontu 17 hanesan elimina ki’ak, eradika hamlaha, saúde no bem estar, edukasaun ho kualidade igualidade jéneru, bee moos no saneamentu.

Depois, traballu dignu no kreximentu ekonómiku, indústria, inovasaun no infraestrutura, redúz dezigualidade, sidade no komunidade sustentável, produsaun no konsumu sustentável, asaun klimátika, proteje vida maritíma, proteje vida rai-leten, pás, justisa no instituisaun efikaz, parseiru ba objetivu sira ne’e inklui mós enerjia moos no asesível (meta 7).

Notísia relevante: RHTO Rekomenda Hadi’a Asesu Eleisaun ba Ema ho Difisiénsia

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here