Diretór Servisu Akademiko IDN, Guilherme Soares. Imajen Tatoli/Egas Cristovão

DILI, 20 outubru 2020 (TATOLI)- Institutu Defeza Nasionál Timor-Leste (IDN-TL), foin lalais ne’e, fahe esperiénsia  hodi introdús matéria jeopolítika no jeoestratéjika ba estudante 150 hosi Fakuldade Siénsia Sosiál Polítika, Universidade Nasional Timor –Lorosa’e (UNTL).

Diretór Akademia IDN, Guilherme Soares dehan, estudante sira hosi semestre IV sira-ne’e tuir formasaun iha IDN-TL durante semana rua ne’ebé hanorin direita hosi Diretór IDN Kapitaun-de-Mar-e-Guerra, Donaciano Costa Gomes “Pedro Klamar Fuik, iha auditoria Pateo, Dili, hahú hosi loron 19 outubru 2020 ba turma A, ho estudante hamutuk 70 resin, no turma B ho estudante hamutuk 70-resin ne’ebé sei kontinua iha semana oin.

“Fundamentu prinsipál hosi matéria ne’e rasik, oinsá estudante foin sa’e hosi UNTL sira bele aprende kona-ba jeopolítika no jeoestratéjika para aumenta sira nia koñesimentu teóriku,” diretór Akademia IDN, Guilherme Soares, hateten ;iuhosi komunikadu imprensa ne’ebé Agência Tatoli asesu, ohin.

Pedro Klamar Fuik sai nu’udar espesialista iha área jeopolítika no jeoestratéjika fahe esperiénsia ba estudante foin sa’e ne’e aprende buat foun hodi kontribui ba sira nia estudu ho di’ak liután

Nia dehan, formasaun ne’e hala’o ba estudante UNTL ba dala rua, tanba iha tinan kotuk, IDN hala’o ona formasaun ba estudante UNTL 150, no agora aumenta tan alunu na’in 150 ba turma A ho turma B.

“Formasaun ida ne’e importante, nune’e IDN iha perspetiva ba estudante sira hanesan lider ba futuru antes sira atinje espetativa ne’e,” nia hateten.

Formasaun ne’e realiza, tanba parte IDN no UNTL asina tiha ona akordu kooperasaun iha janeiru 2020, iha Palaçio  do Governo, ne’ebé hetan sasin hosi Diretora FDCH ho konkordánsia ida katak, dosente IDN bele hanorin iha UNTL, inklui dosente UNTL bele hanorin no halo formasaun sira ne’ebé realiza hosi IDN.

Jornalista   : Eugénio Pereira

Editór        : Francisco Simões