Governu apresentasaun Planu Rekoperasaun Ekonómika iha sesaun plenária Parlamentu Nasionál, tersa (20/10). Imajen Tatoli/Egas Cristovão

DILI, 20 outubru 2020 (TATOLI)—Governu hahú debate medida rekuperasaun ekonómika hamutuk 71 ho Parlamentu Nasionál (PN), ne’ebé foku ba agrikultura, turizmu, abitasaun, eduksaun, saúde, protesaun sosiál no reforma institusionál, ba kurtu no médiu prazu ne’ebé VIII Governu Konstitusionál implementa hahú jullu 2020 to’o 2023.

Aprezentasaun ne’e liuhosi sesaun plenária, ne’ebé Governu reprezenta hosi Ministru Prezidénsia Konsellu Ministru Fidelis Manuel Leite Magalhães, Ministra Finansa interina Sara Lobo Brites, Ministru Koordenadór Asuntu Ekonómiku Joaquim Amaral Ministru Asuntu Parlamentár no Komunikasaun Sosiál Francisco Jerónimo no Ministra Saúde Odete Maria Freitas Belo no Vise-Ministra Solidaridade Sosiál no Inkluzaun Signi Candrawati Verdial.

Ministru Fidelis iha ninia intervensaun konsidera pandemia globál oferese oportunidade importante atu entidade hotu bele aprende no iha biban ne’e envolve forsa hosi povu no unidade nasionál maski sei iha dezafíu.

 “Ita-nia prioridade polítika sei habelar objetivu ekonómiku hanesan amplu hosi programa Governu atubele harii dalan kreximentu sustentável ne’ebé forte liu no dezenvolvimentu ekuitativu,” governante ne’e dehan, iha tersa ne’e.

Notísia Relevante: Komisaun planu rekuperasaun ekonómika rekomenda medida 71 hosi sub-setór ualu

Atu halo kreximentu sustentável iha rai laran, Governu iha ona polítika makroekonómika atu apoiu dezenvolvimentu iha setór produtivu hanesan agrikultura, turizmu, petróleu, minerál no manufatura, inklui promosaun setór privadu no fortalese sustentabilidade fiskál no indústria finanseira.

“Ida ne’e signifika ita revitaliza polítika makroekonómika apoia dezenvolvimentu infraestrutura, serbisu ba foin-sa’e sira no konstrui rekursu umanu no hasa’e kapasidade ba ita-nia instituisaun públika,” nia akresenta.

Aleinde ne’e, sei reforsa no implementa polítika hodi garante implementasaun asaun no estratéjia ba kreximentu sustentável no dezenvolvimentu ekuitativu iha nasaun hotu ne’ebé envolve prioridade imperativa haat.

Prioridade haat ne’e maka dahuluk dezenvolvimentu agronegósiu, peska no turizmu, ne’ebé hanesan setór potensiál atu apoia transformasaun ekonómika país iha prazu badak no médiu liuhosi investimentu agregasaun ho valór no kualidade di’ak ne’ebé haree ba merkadu importasaun.

“Ida-ne’e hanesan baze fundamentál ba dezenvolvimentu ekonómiku no sosiál país nia, ne’ebé iha oportunidade importante atu aproveita iha tranzisaun produsaun subsisténsia ba produsaun emprezariál ba produtu agríkola, pekuária no peska,” nia esplika.

Daruak, governante ne’e nota katak teknolojia sempre sai hanesan motór prinsipál ba dezenvolvimentu, tanba ne’e aproveita teknolojia hanesan promesa boot ida ba setór-xave sira iha dezenvolvimentu prazu naruk inklui turizmu no komérsiu hanesan mós ba modernizasaun Estadu no hadi’a prestasaun servisu instituisaun públika sira.

Prioridade datoluk maka forsa traballu ne’ebé kualifikada maka kondisaun nesesária ba dezenvolvimentu ekonómika sustentável, ne’ebé impulsiona atuálizasaun kualidade hosi produtu no kreximentu produtividade estimula empriendedorizmu no seluk seluk tan.

“Tanba ne’e, ita sei kontinua hadi’a kualidade ensinu no fromasaun profisionál, hodi garante asesu ne’ebé hanesan ba populasaun timor-oan hotu iha área,” nia hatutan.

Ikus liu, Governu sei revitaliza promosaun ba indústria hanesan forsa ne’ebé dudu dezenvolvimentu ekonómiku nasionál, hanesan Parké Industriál Timor Leste nian ne’ebé planeadu ho objetivu mak atu atende setór lojístika no armajenamentu tanba ninia pozisaun únika iha korredór ekonómiku prinsipál sira.

“Ita sei fó apoiu ba setór komplementár sira tuir kapasidade atu atende ba objetivu hosi parké industriál ne’e hanesan agregasaun valór nodiversifikasaun ekonómika, ne’ebé iha ninia parte tenke aliñada ho estratéjia ekonómika no indústriane’ebé ampla liu,” governante ne’e fó hanoin.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here