Primeiru-Ministru, Taur Matan Ruak , prezide reuniaun hodi ko’alia kona-ba projetu fibra óptika, iha Palásiu Governu, tersa (20/10). Imajen Tatoli/Egas Cristovão

DILI, 20 outubru 2020 (TATOLI)—Primeiru-Ministru (PM), Taur Matan Ruak, konvoka reuniaun ho Vise Primeiru-Ministru no Ministru Planu no Ordenamentu, José Reis no Ministru Transporte no Komunikasaun, José Agostinho da Silva, hamutuk ho ekipa tékniku ministériu, hodi diskute kona-ba opsaun instalasaun fibra óptika no modalidade finansiamentu.

Ministru José Reis informa opsaun ba investimentu boot ne’e sei lori ba reuniaun Konsellu Ministru hodi bele hetan ideia hosi membru Governu sira no aprovasaun hodi bele hahú prosesu dada kabu submarinu.

“Ha’u rasik maka husu ba Primeiru-Ministru hodi konvoka enkontru ida ho objetivu atu hato’o opsaun tékniku, opsaun polítika, modalidade finanseira, jurídika, kona-ba traballu tékniku ne’ebé durante ne’e la’o daudaun hosi ha’u-nia ministériu no ministériu sira seluk hanesan Ministériu Finansa, Ministériu Obra Públika no Ministériu Transporte Komunikasaun kona-ba fibra óptika ne’ebé ita atu dada hosi Darwin mai Timor-Leste,” Ministru Planu no Ordenamentu informa iha Palásiu Governu, tersa ne’e.

Tuir nota ne’ebé Agência TATOLI asesu, polítika dada kabu submarinu hosi Darwin mai Timor-Leste nu’udar prioridade Governu, ho kooperasaun Governu Canberra ho objetivu atu eleva kapasidade rede internét iha rai laran tanba VIII Governu Konstitusionál mós iha programa ba Governu eletróniku, ne’ebé atu realiza presiza iha liña internét ne’ebé lais.

Daudaun ne’e, banda internét internasioál ne’ebé maka Timor-Leste iha ho kapasidade 6 Gigabyte/segundu, ne’ebé fahe ba populasaun iha territóriu tomak ne’ebé asesu ba internét liuhosi operadór Timor-Telecom, Telkomcel no Telemor.

Enkuantu, Governu liuhosi Ministériu Transporte no Komunikasaun aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.

Governu iha ona planu atu atualiza husi kapasidade 200 megabyte ba 1 Gigabyte, atubele ajuda bainhira seidauk iha rede fibra ótika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here