Governu Apresentasaun Plano Rekoperasaun Ekonómika Reprezentante Povu iha uma fukun Parlamento nasional. iha Sala Plenáriu PN, Tersa (20/10). Imajen Tatoli/Egas Cristovão

DILI, 20 outubru 2020 (TATOLI)—VIII Governu Konstitusionál lideradu Primeiru Ministru (PM), Taur Matan Ruak, konsidera setór edukasaun importante iha planu rekuperasaun ekonómika faze daruak nian.

Tuir dokumentu planu rekuperasaun ekonómika aprezenta ba Parlamentu Nasionál ohin, ne’ebé Agência TATOLI asesu iha faze daruak ne’e Governu introdúz medida sia (9) tán iha setór edukasaun ne’ebé deskreve iha pájina 15-20.

Dokumentu ne’e finaliza hafoin koordenasaun no kompilasaun entre Komisaun C (Finansa Públika), Komisaun D (Ekonomia no Dezenvolvimentu) no Komisaun A (Justisa no Konstitusionál).

Dokumentu ne’e elabora hosi analista sira hosi Komisaun C (Finansa Públika) Natália Bere, Pinto Cardoso hanesan peskizadór Edukasaun, Turizmu nian mak Peskizadór Fulgêncio Aquino no analista legál sira hosi Komisaun A (Justisa no Konstitusionál).

“Medida daruak ne’e konsidera hanesan polítika intervensaun ka normalizasaun pós COVID-19 ho prazu implementasaun médiu no tempu naruk (2021-2022 ba leten). Tanba ne’e Governu konsidera setór edukasaun nu’udar pilár importante ida hosi planu rekuperasaun ekonómika faze daruak nian,” haktuir dokumentu refere ne’ebé distribui hosi relasaun públiku Parlamentu Nasionál, tersa ne’e.

Planu rekuperasaun ekonómika ba faze daruak ne’e mak hanesan  aumenta persentajen iha gastu ba edukasaun liuhosi Orsamentu Jerál Estadu (OJE) pelo menos to’o lejizlatura ida-ne’e nia rohan.

Iha dokumentu ne’e mós sei haboot tán númeru CAFÉ (Centro de Aprendizagem e Formação Escolar), kontinua habelar rede estabelesimentu ensinu sekundáriu, pre-eskolár no sentru formasaun profisionál.

Iha faze daruak ne’e mós sei promove obra manutensaun ka rekuperasaun ba edifísiu eskolár, redusaun númeru alunu ba kada profesór sira.

Estabelese akordu ho Portugál no Brazil hodi apoia CAFE foun no daneen hadi’a programa formasaun ba profesór sira  iha grau ensinu oinoin no prodús no distribui manual eskola ba alunu sira no dosente sira.

Nune’e mós rekupera karta edukativa hamutuk 13 ne’ebé elabota tiha ona, atualiza sira no utiliza hanesan instrumentu importante hosi planeamentu no estratéjia edukativa.

Iha planu rekuperasaun faze daruak ne’e mellora merenda eskolár iha prosesu implementasaun, kria liña kréditu ho kondisaun konsesionál hodi fó apoia finanseira ba instituisaun ensinu superiór privada ne’ebé akreditadu nu’udar meiu ida atu substitui subvensaun públika atuál.

Medida ikus liu hosi faze daruak ne’e sei define programa retensaun ba joven lisensiadu ho forma atu evita “fuga” ba esteriór hodi buka opurtunidade empregu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here