DGE komemora loron mundiál estatístika, iha sala enkontru DGE, Caicoli, tersa (20/10). Imajen Tatoli/Egas Cristovão

DILI, 20 outubru 2020 (TATOLI)–Iha ámbitu komemorasaun Loron Mundiál Estatístika, Governu liuhosi Ministériu Finansa (MF) dezeja Diresaun Jerál Estatístika (DGE, sigla portugés) kontinua serbisu ho di’ak no esforsu hodi promove polítika bazeia ba evidénsia.

Ministra Finansa ein ezersísiu, Sara Lobo Brites, felisita diresaun ne’e no apresia ba publikasaun importante hanesan konta nasionál 2019, dadus komérsiu annuál 2019, mapamentu ba aldeia sira, estatístika krime 2019, no inflasaun setembru 2020.

“Hau hato’o parabéns ba Diresaun Jerál Estatístika, Diretor Jerál no funsionáriu tomak, ne’ebé festeza loron estatístika no kontinua hala’o knaar ho di’ak hodi kontribui promove politíka públika bazeia ba evidénsia,” atuál Vise-Ministra Finansa ne’e hateten liuhosi diskursu ne’ebé lee hosi Diretór Jerál Estatístika, Elias Ferreira iha resintu DGE, Caicoli, tersa ne’e.

Iha tinan ida ne’e, Timor-Leste komemora loron mundiál ne’e ba dala-tolu no mundu tomak selebra loron ne’e iha kada tinan lima.

Nia konsidera, iha ámbitu pandemia COVID-19, dadus no informasaun kredível, relevante no atualizada, nu’udar fatór determinante atu rekupera saúde públika, ekonomia no vida sosiál, nune’e Nasaun Unida lansa lema “data we can trust” ba tinan ida ne’e.

DGE komemora loron mundiál ne’e nu’udar instituisaun públika, ne’ebé kontinua envolve no dezenvolve an atu serví Estadu no povu Timor-Leste ho di’ak liuhosi peskiza no analiza sira ho publikasaun dadus no informasaun estatístika.

Dezenvolvimentu instituisaun ida nu’udar prioridade Governu hanesan hakarek ka estipula ona iha Planu Estratéjiku Dezenvolvimentu Nasional (PEDN) 2011-2030, katak atu transforma diresaun ne’e ba Instituisaun Estatístika Nasionál Timor-Leste hodi asegura independénsia no profesionalidade ba fornesimentu dadus no informasaun estatístika.

“Atu hetan meta ida-ne Diresaun Jerál Estatístika habelar ninia knaar iha munisípiu tomak inklui iha Rejiaun Administrativa Ekonomia Espesiál Oé-cusse Ambeno (RAEOA) no Ministériu Finansa daudaun halo preparasaun kuadru legál, rekursu umanu, fasilidade infrastrutura nesesária,” nia informa.

Knaar fundamentál DGE maka atu halo peskiza, analiza, no publikasaun regulár hodi tulun públiku asesu informasaun atualizada no kredível, nunee publikasaun ne’ebé atu lansa sei tulun Governu atu hatene kona-ba Timor-Leste ninia situasaun no dezenvovimentu sosiu ekonómiku,

“Husu ba entidade tomak atu uza dadus hirak ne’e ho di’ak tanba informasaun hirak ne’e hetan liuhosi investimentu osan, tempu no enerjia ne’ebé boot,” Ministra interina ne’e fó hanoin.

Publikasaun kona-ba konta nasionál Timor-Leste sei fó sai informasaun ekonómika atualizada to’o 2019 no relatóriu ne’e hatudu rekuperasaun ekonómika 1,8% hosi resesaun ekonómika iha 2017 no 2018.

Haree hosi fatór ne’ebé kontribui ba kreximentu ekonómiku iha 2019, sétor públiku hetan kreximentu 5,8%, boot liu kompara kontribuisaun setór privadu ne’ebé aumenta de’it 3,2%.

Iha parte seluk, indústria hotu hatudu kreximentu pozitivu iha 2019 maibé sei iha nível kiik.

Membru ezekutivu ne’e dehan, publikasaun kona-ba komérsiu annuál hatudu katak Timor-Leste kontinua sai nu’udar nasaun ne’ebé depende maka’as ba importasaun tanba balansu pagamentu ba komérsiu internasionál hatudu katak esportasaun boot liu kuaze 400% ho importasaun.

Dadus ne’e implika katak produtividade ekonómika iha rai-laran sei kiik no presiza hola medida própria hodi dezenvolve indústria iha Timor-Leste bazeia prinsípiu vantajen komparativa no kompetitiva.

Publikasaun kona-ba Timor-Leste iha númeru fó dadus relavante to’o iha nível munisípiu, sei tulun Governu atu hatene kona-ba demografia, potensialidade no oportunidade ne’ebé kada rejiaun no munisípiu sira iha.

Ho dadus hirak ne’e, sei tulun atu prepara programa dezenvovimentu ne’ebé bele responde duni ba nesessidade ne’ebé iha.

Enkuantu, publikasaun seluk ne’ebé lansa hamutuk iha eventu ida ne’e ho natureza diferente maibé ba objetivu ida de’it katak fó informasaun ne’ebé loos, relevante no atualizada.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here