Komandante Jerál PNTL, Komísariu Faustino da Costa. Imajen Tatoli/Egas Cristovão

DILI, 20 outubru 2020 (TATOLI)- Komandu Jerál Polísia Nasionál Timor-Leste (PNTL), ohin, hala’o enkontru ho komandante munisípiu no unidade sira hodi hatún orden atu forma ekipa halo operasaun durante loron finadu hodi kontrola movimentu transporte públiku sira para labele tula pasajeiru liu fali karreta nia kapasidade.

Komandante Jerál PNTL Komisáriu Faustino da Costa, alerta ba motorista transporte públiku atu tau konsiderasaun aas salva  pasajeiru sira nian vida hodi evita kazu asidente tráfegu.

Komandante PNTL ne’e mós husu ba patraun transporte públiku sira atu sama atensaun ba sira-nia motorista hotu-hotu lori karreta labele buka hadau de’it maka osan, maibé tenke la’o kalma no labele hadau malu pasajeiru iha terminál hodi evita konfrontasaun.

PNTL mós sei halo seguransa maka’as iha tempu misa no tempu lori ai-funan no lilin ba sunu no kari semitériu públiku hotu iha territóriu Timor-Leste.

“Komandu bolu komandante hotu-hotu mai hodi fó orientasaun oinsá atu asegura seguransa durante loron finadu hodi evita ema ba misa halo problema no ba rate halo problema no kontrola mós movimentu transporte públiku sira labele hadau malu tula pasajeiru liu fali karreta nia kapasidade,” dehan Komisáriu Faustino da Costa, ohin, ba jornalista iha Komandu Jerál PNTL, Caicoli, Dili.

PNTL sei halo operasaun, bainhira identifika transporte públiku sira ne’ebé viola lei sei halo apreensaun ba transporte hodi selu multa tuir lei tránzitu nian.

“Semana ne’e ita komesa observa karreta Dili ba Baucau, Lospalos, Viqueque no fatin seluk tan. Karreta lolon tula ema nakonu ne’e ita sei prende,” nia afirma.

Nia hatutan, iha área marítima nian, PNTL liuhosi Polísia Unidade Marítima sei kontrola ró ki’ik too ró boot hanesan, Berlin Nakroma no Ró Laju-Laju sei tula pasajeiru tuir ró ninia kapasidade.

PNTL mós sei halo operasaun ba karreta Estadu ne’ebé halo movimentu la iha karta kondisaun no viajen la uza gia de marsa sei halo apreensaun.

Jornalista   : Eugénio Pereira

Editór        : Francisco Simões

1 KOMENTÁRIU

  1. Controlo mak tenke máximo tanba esperensia tinan-tinan antes ba selebrasaun loron bot ruma, informasaun no ordem sempre sai antes mais realidade balun la tuir ordem ne’ebe mak iha.
    Bom trabalho ba equipa PNTL nian ne’ebe mak sei halo operasaun ba movimentasaun transporte, espera katak ita hotu sei kontribui ita nia konsiensia hodi lao tuir nafatin regulamentu ne’ebe mak iha👍

HAKEREK NO HATÁN

Please enter your comment!
Please enter your name here