Diretór Jerál Estatístika, Elias dos Santos Ferreira, Imajen Tatoli/Egas Cristovão

DILI, 20 outubru 2020 (TATOLI)–Diretór Jerál Estatístika, Elias dos Santos Ferreira, hateten Diresaun Jerál Estatistika (DGE, sigla portugés) preparadu ona atu hambrik independente hanesan Institutu Públiku (IP).

“Esbosu lei ba transformasaun Diresaun Jerál ba Institutu Públiku, loloos ne’e iha tinan hirak liubá bele diskute ona maibé tanba Governu utiliza de’it Dotasaun Orsamentu Temporária maka labele halo buat ida,” Diretór ne’e hateten iha sala enkontru DGE, Caicoli, tersa ne’e.

Tuir planu diresaun ne’e sei sai hanesan instiuisaun ida ne’ebé independente maski daudaun iha serbisu balun maka hahú jere mesak no ba oin sei jere mesak rekursu umanu, dadus no seluk tan.

Nia dehan, rekursu umanu no dadus DGE preparadu no daudaun haree ba infraestrutura iha munisípiu 12 inklui Rejiaun Administrativu Espesiál Oé-cusse Ambeno atu estabelese hotu edifísiu própriu.

“Intermu infraestrutura iha munisípiu hotu, iha ona edifísiu própriu estatístika nian kompleta ho fasilidade no funsionáriu, maibé importante liu mak tenke jere rasik orsamentu nune’e bainhira hakarak halo peskiza ba nesesidade sira ne’ebé presiza realiza, ami bele implementa liuliu rezultadu sira,” nia akresenta.

Tuir Elias, rezultadu peskiza la’ós fó sai dadus de’it maibé númeru iha tabela inklui iha mapa.

Bazeia ba Planu Estratéjiku Dezenvolvimentu Nasional (PEDN) 2011-2030, mensiona atu transforma diresaun DGE ba Instituisaun Estatístika Nasionál Timor-Leste hodi asegura independénsia no profesionalidade ba fornesimentu dadus no informasaun estatístika.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here