esfigmomanômetru ka aparellu koko tensaun.imajen/Google.

DILI, 19 outubru 2020 (TATOLI)-Xefe Sentru Saúde Becora, Adelina Pinto, informa foinlalais ne’e simu ona apoiu ekipamentu hanesan esfigmomanômetru ka aparellu ho ninia funsaun atu koko tensaun (Sphygmomanometer-sigla inglés)hamutuk rua husi Servisu Saúde Munisípiu Dili.

“Durante ne’e ami iha aparellu ida de’it, no sira fó tan rua tanba ne’e, mak ami sufisiente ona,” Ezekutiva Sentru Saúde Becora ne’e, informa ba Tatoli, via telefone segunda ne’e.

Notísia Relevante :Agora rai rahun maka’as, inan-aman fó atensaun labarik sira

Nia esplika husi esfigmomanômetru foun rua ne’e, ida rai iha sala maternidade no ida seluk rai iha fatin konsulta ba inan isin-rua.

“Aparellu tolu ne’e sufisiente ona, aparellu ida tuan ne’e rai iha sala emerjénsia hodi fó tratamentu ba pasiente ho problema tensaun,” nia hatutan.

Iha parte seluk Diretora Saúde Munsípiu Dili, Agostina Segurado, rekomenda ba Sentru Saúde sira iha kapitál Dili  atu uza aparellu ba koko tensaun nian tuir nesesidade liliu atu koloka iha fatin konsulta pasiente, sala emerjénsia, fatin maternidade no la’ós ba iha diresaun hotu-hotu.

”Aparelu ne’e iha ita-nia fatin laiha bainhira laiha ita halo meius oinsá halo pedidu ba iha Diresaun Ekipamentu Médiku mak laiha ita buka meius sosa tanba sasán ne’e importante ami tenki buka meius hodi sosa tanba aparellu tensaun ho folin  $ 25,  $30, $40,” Agostina Segurado, hateten ba Tatoli via telefone, segunda ne’e.

Daudaun ne’e, nia dehan Servisu Saúde Munisípiu labele sosa fasilidade hirak ne’e ho kuantidade barak tanba uza hela Dotasaun Orsamentu Temporáriu (DOT), ho nune’e maka prevee ona iha proposta Orsamentu Jerál Estadu atu sosa iha tinan 2021.

Notísia Relevante :Sentru Saúde Becora Menus Ai-moruk Orál

Jornalista : Felicidade Ximenes

Editór :Agapito dos Santos

HAKEREK NO HATÁN

Please enter your comment!
Please enter your name here