Prokuradór Jerál Repúblika, José Ximenes. Imajen Tatoli /Egas Cristovão

DILI, 19 outubru 2020 (TATOLI)-Prezidente Repúblika (PR), Francisco Guterres ‘’Lú-Olo’, preokupa ho “sindikatu” ne’ebé envolve iha falsifikasaun dokumentu veteranu hodi hetan pensaun veteranu no martires sira nian hosi Estadu.

Notísia Relevante : Falsifika dokumentu veteranu, arguidu sira hetan pena prizaun tinan-lima ho tinan-sia

“Prezidente Repúblika preokupa tebe-tebes liu-liu ho krime organizadu sira  hanesan falsifikasaun dokumentu ne’ebé akontese iha Komisaun Omenajen ne’ebé envolve  membru veteranu balun,” Prokuradór Jerál Repúblika (PGR), José Ximenes, hateten, ohin, ba jornalista sira, hafoin  enkontru ho Xefe Estadu iha Palaçio Prezidensial, Bairru Pite, Dili.

PR Lú-Olo husu Ministériu Públiku (MP) atu kontinua  assume nia kna’ar no responsabilidade  ho imparsiál no independénsia atua ba kualkér sidadaun hotu hakru’uk ba justisa  hodi investiga ba kazu organizadu oi-oin   tuir prosesu  legal.

José Ximenes hateten, veteranu balun depois luta libertasaun patria  ba envolve fali iha kazu sira-ne’e.

Nia dehan, iha loron 16 fulan ne’e, Tribunál Distritál Dili (TDD) hola  desizaun finál aplika pena prizaun efetivu tinan-lima  ho tinan-sia ba arguidu na’in-lima  tanba faktu provadu falsifika dokumentu veteranu hodi simu pensaun hosi Estadu ho montante global $93,547.00.

Prosesu ne’e envolve hosi arguidu no arguida na’in-sia  hanesan Joaquim Silva ‘’Mate Restu” hanesan ’hanesan veteran ida, Osvaldo Paulo, Mario de Araújo, Marcelino Pereira, Agostinha da Costa Maria, Constantino de Jesus Maia, Celio Maria Noronha Lay, Delio de Jesus Lobo Campos ho Domingos Mendonça.

 Arguidu sira-ne’e balun servisu iha Komisaun Omenajen, Ministériu Solidariedade Sosiál no Inkluzaun, Sekretariadu Tékniku Administrasaun Eleitoral (STAE) no Banku BNU.

 PGR José Ximenes afirma, veteranu naran sagradu, ema hotu tenke respeita, la’ós veteranu sai hanesan broker buka ema sira nia naran ne’ebé iha Komisaun Omenajen ninian suspende ema no buka ema seluk tau hodi falsifika para simu osan.

Nia afirma, MP sei halo rekursu hasoru arguidu na’in-rua ne’ebé Tribunál absolve, tanba Komisaun Omenajen haruka karta ba banku ho dokumentu sira  tanbasá banku fó fali pagamentu ba ema sira ne’ebé  hatene katak falsu, tanba ne’e tenke verifika ba dokumentu.

Prokuradór Jerál Repúblika PGR sei koordena ho Ministériu asuntu  Kombatente ba Libertasaun Nasionál ( MCLN) hadi’a lei balun haree ba asuntu ne’e.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here