Trbailbailador EDTL halo hela instalasaun ba eletrisidade iha Bebora Dili.Imajen/Antonio Goncalves

DILI, 19 outubru 2020 (TATOLI)—Reprezentante Povu iha uma fukun Parlamentu Nasionál (PN) husu Governu atu fasilita ekipamentu protesaun ba eletrisita sira-ne’ebé servisu iha Eletrisidade de Timor-Leste (EDTL).

Notisia Relevante: Tékniku EDTL Baucau mate tanba ahi soke

Vise-Prezidente Parlamentu Nasionál, Deputada Maria Angelina Sarmento Lopes, husu ba Governu tenke atensaun másimu ba kondisaun eletrisista sira hosi EDTL.

“Asidente ne’ebé akontese ba pesoál EDTL nian, ne’e tristeza tebes tanba matebian halo dedikasaun tomak hodi sa’e hadi’a liña eletrisidade ne’ebé iha fallansu maibé to’o ikus nia duni mak tenke sakrifika nia vida. Ida-ne’e mak ita dehan eroi ba nasaun ida-ne’e, husu ba ministériu relevante atu toma atensaun kondisaun ba ema sira-ne’ebé servisu liga ho liña baixa ne’e,”  Deputada Maria Angelina Sarmento Lopes, fó hanoin ba Governu liuhosi plenária, segunda ne’e.

Deputadu PLP ne’e husu Governu tenke urjentemente tau atensaun ba kazu Baguia ne’ebé sai referénsia ba tékniku EDTL iha munisípiu tomak hodi nune’e situasaun ne’e labele akontese tán ba eletrisista sira.

Entretantu, Deputadu Bankada FRETILIN, David Dias Ximenes “Mandati”, husu Governu atu fó solusaun ba dezastre nune’e labele akontese tán ba eletrisista sira.

“Dezastre iha ida Baguia nian, ema-nia oan ne’e iha tiha leten derrepente mak ahi lakan nia mate atu lori ba ospitál mós la konsege. Ema ne’e mate tiha mak tula ho motorizada de’it tanba laiha ambulánsia,” nia dehan. 

Iha biban hanesan, Deputadu Bankada Partidu Demokrátiku (PD), Mariano Assanami Sabino, husu Governu tenke toma nota ba situasaun ne’e.

“Salvasaun ba sira-ne’ebé servisu iha EDTL ne’e importante tebes. Ita nunka fó atensaun ba ita-nia ema ne’ebé servisu iha perigu laran. Ne’e la’ós primeira vez. Ema lubuk mate ona tanba eletrisidade soke ne’e maibé to’o agora la fó atensaun ba ida-ne’e,” nia dehan. 

Iha sikun seluk, Deputadu Bankada PLP, Noé da Silva Ximenes “Buka-Tuir”, fó hanoin ba Governu atu fasilita ekipamentu edekuada ba tékniku EDTL sira.

“Solusaun mak mak ne’e Governu presiza fasilita ekipamentu pesoál adekuada ba sira nune’e eletrisista sira labele hasoru tan situasaun hanesan ne’e,” nia hateten. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here