Vise-Prezidente Parlamentu Nasionál, Deputadu Luis Roberto. Imajen TATOLI/Doc.

DILI, 19 outubru 2020 (TATOLI)—Parlamentu Nasionál (PN) adia ajenda ida atu hasai imunidade ba Deputada Olinda Guterres tanba parte Komisaun A (Justisa no Konstitusionál) sei haree didi’ak.

Notisia Relevante: Aban, PN hasai imunidade Deputada Olinda Guterres

“Ajenda atu hasai imunidade ne’e sei adia tanba ita bazea ba legalidade ne’e, señora deputada ne’e lezada. Ne’ebé, atu autoriza ka la autoriza ne’e, kompeténsia plenária nian. Ajenda ne’e adia ba semana oin tanba Komisaun A sei estuda fila-fali didi’ak lai,”  Vise-Prezidente Parlamentu Nasionál, Deputadu Luis Roberto, informa ba jornalista sira iha resintu Parlamentu Nasionál, segunda ne’e.

Nia hatutan, bainhira parlamentu fó autorizasaun bele informa ba tribunál liuhosi karta eskrita.

Nia afirma, maske Deputada Olinda Guterres hakarak ba hatán maibé bazea ba legalidade ne’e la’ós hanesan ne’e.

“Ohin, dadeersan ami foin ko’alia asuntu ne’e ho Prezidente Parlamentu Nasionál tan ne’e mak ajenda ne’e adia ba semana oin. Ha’u hanoin bazea ba rejimentu bele responde liuhosi karta eskrita ba tribunál kona-ba notifikasaun ne’ebé mai hosi tribunál ne’e,” nia hateten.

 Jornalista: Evaristo Soares Martins

Editór: Cancio Ximenes  

HAKEREK NO HATÁN

Please enter your comment!
Please enter your name here