Deputada Bankada PLP, Maria Angelina Sarmento Lopes. Imajen/Egas Cristovão

DILI, 19 outubru 2020 (TATOLI)—Bankada parlamentár Partidu Libertasaun Populár (PLP) husu Governu tau importánsia ba Postu Administrativu Atauro iha proposta Orsamentu Jerál Estadu (OJE) 2021.

Deputada Bankada PLP, Maria Angelina Sarmento Lopes, husu Governu liuhosi Ministériu Obra Públika prioritiza Atauro iha proposta OJE 2021.

“Ha’u husu Governu tau atensaun ba Postu Administrativu Atauro, liuliu Suku Makadadi tanba populasaun sira iha ne’ebá hola inisiativa ke’e estrada rasik, tanba ke’e fatuk hodi halo sira-nia estrada,” Deputada PLP ne’e fó hanoin ne’e liuhosi plenária Parlamentu Nasionál, segunda ne’e.

Razun Deputada PLP husu Governu tau atensaun tanba Atauro mós parte ida hosi Zona Ekonomia Eskluziva (ZEE) hanesan mós Rejiaun Administrativa Espesiál Oecusse-Ambeno (RAEOA).

“Ne’ebé, ha’u husu ba Governu atu iha OJE 2021 bele mós fó porsaun balu ba orsamentu 2021 nian ho atensaun ba Atauro,” nia hateten.

 Vise-Prezidente Parlamentu Nasionál ne’e husu Ministériu Obra Públika (MOP) liuhosi Institutu Jestaun no Ekipamentu (IJE) atu-bele fó apoia ekipamentu ba populasaun sira-ne’ebé ke’e rasik sira-nia Estrada iha suku Makadadi.

Tanba, tuir nia, oras-ne’e populasaun hosi suku refere ke’e hela Estrada nune’e bele fasilita iha progresu ke’e Estrada ne’e.

Deputada PLP identifika asuntu ne’e hafoin hala’o kontaktu eleitorál ba Postu Administrativu refere iha semana kotuk.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here