DILI, 19 outubru 2020 (TATOLI)–Prokuradór Jerál Repúblika (PGR-sigla portugés), José da Costa Ximenes, rekomenda ba Governu, liuliu Ministériu Obra Públika (MOP), atu labele halo pagamentu ba projetu-sira ne’ebé laiha kontratu servisu.
Notísia Relevante : Governu hein paresér legál MP solusiona projetu 44 laiha kontratu
“Dezde iha fulan tolu ka haat liubá aprezenta projetu 143 ne’ebé ita hala’o analiza, balun iha kontratu no balun laiha kontratu. Tanba ne’e, Estadu kualkér iha mundu kumpre nia devér bainhira laiha kontratu di’ak liu lalika selu,’’ PGR José Ximenes, hateten, ohin, hodi responde Agência Tatoli iha Paláçio Prezidensiál, Dili.
Nia hatutan, MP identifika projetu balun laiha kontratu, projetu balun seidauk halo no balun kontratu laiha servisu halo tiha ona servisu.
“Pur-ezemplu, halo mota ida iha ne’ebá suru sees hotu ona buat ida laiha agora atu ba selu saida loos. Projetu iha ne’ebá hanesan halo mós la halo agora husu pagamentu atu halo saida depois kontratu laiha tan,” José Ximenes hateten.
José Ximenes hatutan, se lae osan minarai ne’ebé iha sei fakar de’it ba projetu laiha kualidade no laiha kontratu.
Relasiona ho projetu 143 ne’ebé konsellu Administrasaun Fundu Infraestrutura (KAFI) aprova iha loron 19 jullu 2017, iha projetu 44 maka Ministériu Obra Públika (MOP) identifika laiha kontratu, tanba ne’e Governu deside hein paresér legál hosi Ministériu Públiku (MP) hodi solusiona.
Jornalista: Nelson de Sousa
Editór: Francisco Simões
