Imajen/Facebook. Amau Uailili Gimata.

BAUCAU, 19 outubru 2020 (TATOLI)—Provinsiál Salesiano Don Bosco São Callisto Caravario  Timor-Leste no Indonézia, Padre Apolinário Maria Neto, SDB, rekoñese matebian Padre Ilídio Correia, SDB, nu’udár padre salesiano ne’ebé fó aan tomak hodi serbí foinsa’e sira.

Notisia Relevante: PN hato’o sentida kondolénsia ba Pe. Ilídio Correia

Konsiderasaun ne’e, Padre Apolinário Neto hato’o liuhosi liafuan ikus reprezenta kongregasaun nian,iha misa requiem ne’ebé hala’o iha santuáriu nasionál Maria Auxilidora Fatumaca, Gariuai, Baucau (19/10).

“Nu’udár ema kongregasaun Salesiano nian, Amu Ilídio serbisu makaas atu soi klamar sira. Amo Ilídio esperimenta duni iha nia moris. Nu’udár Salesiano nia fó aan tomak hodi serbí foin sa’e sira, liuliu iha parte formasaun, prepara foin sa’e sira, balun sai duni amu lulik salesiano, balun sai amo lulik ba dioseze sira, no balun sai sidadaun timor ne’ebé diak,” Padre Apolinário hateten.

Provinsial ne’e dehan, Padre Ilídio hatudu duni ninia domin nu’udár amu-lulik ne’ebé hadomi foinsa’e sira durante tinan 28 nia laran.

“Nia sempre prontu iha kualkér oras bainhira foinsa’e sira presiza ninia prezensa no presiza ninia tulun. Tanba ne’e, nu’udár amu lulik salesiano, nia iha domin boot ba ninia kongregasaun no nia hola tempu barak liu iha uma formasaun nian,” Padre Apolinário haktuir tan.

Nia fiar katak ema barak mak sente lakon Amu Ilídio nu’udár belun-di’ak ida maibé tenke iha nafatin esperansa no fiar katak amu Ilídio hamutuk ona ho Aman Maromak ne’ebé sei haraik ba ema hotu bensaun oin-oin iha ida-idak nia vokasaun no misaun.

Entretantu, misa requiem ba mate-isin Padre Ilídio Correia, SDB,  prezide hosi Arsebispu Metropolitana Dili Don Virgílio do Carmo da Silva, no marka prezensa mós husi Bispu dioseze Baucau Don Basílio do Nascimento,  amu-lulik sira hosi dioseze tolu, família boot Salesiano Dom Bosco kompostu hosi padre, bruder, frater, noviços no pre-noviços sira, relijiozu sira, família boot hosi Vemasse, sarani sira hosi parókia, komunidade Salesiana sira iha Timor, antigu alunu sira, sarani sira hotu iha Zona Fatumaca,  maluk no parente sira hotu amu Ilídio nian no estudante sira hosi Colégio Dom Bosco Fatumaca nian.

Biodata

Padre Ilídio Eduardo do Rosário Correia, SDB Moris iha Quelicai iha loron 13 fulan outubru tinan 1970 hosi fuan domin hosi Ilídio do Rosário Correia (Aman) no Carolina da Costa Freitas (Matebian), no padre Ilídio mak oan-ikun hosi maun-alin no bin-feton na’in-neen (6).

Padre Ilídio hahú ninia:

– Eskola Primaria São Domingos Sávio Quelicai, hosi tinan 1978–1984

– Eskola Pre-Semináriu Salesiano Fatumaca-Gariuai, hosi tinan 1984–1987

– Eskola Sekundária iha Aspirantadu Salezianu Fatumaca, husi tinan: 1987 – 1990

Formasaun Saleziana

Iha fulan maiu tinan 1989–fulan juñu 1990, Pe. Ilidio hala’o ninia formasaun Pre–Noviciado iha Fatumaca. Iha loron 13 juñu 1990, Pe. Ilidio hamutuk ho nia maluk nain sia (9) hahu sira nia formasaun noviciado iha Fatumaca.

Iha loron 13 fulan juñu tinan 1991, Pe. Ilídio hamutuk ho nia maluk na’in hitu (7) halo primeira profisaun iha Fatumaca. Depois de primeira profisaun, Pe. Ilidio ba hala’o ninia estajiu nu’udar asistente iha Pre-aspirantadu, Beato Filipe Rinaldi, Venilale hosi tinan 1991–1992. Iha tinan 1992–1996, Pe. Ilidio Correia, SDB, hela iha komunidade Don Bosco, Sunter, Jakarta-Indonézia hodi hala’o ninia estudu filozófiku iha Sekolah Tinggi Filsafat Driyarkara, Jakarta, no hasai kursu Lisensiatura iha Filozofia.

Tinan Estajiu nian

Hafoin remata estudus filosófikus, Pe. Ilidio Correia, SDB hala’o ninia estajiu iha komunidade Fatumaca husi tinan 1996 – 1998 nuudar profesor no asistenti ba STM Dom Bosco, Fatumaca.

Estudus Teolójikus

Depois hala’o tiha ninia estajiu, Pe. Ilidio simu obediencia hodi ba hala’o ninia estudus teolójiku iha Salesian Theological Institute of Cremisan, Jerusalem husi tinan 1998-2002. Pe. Ilidio halo profisaun perpétua iha loron 24 fulan maiu tinan 2000. Pe. Ilidio simu ordenasaun Diakonadu iha loron 03 juñu 2001, hosi Bispo Don Carlos Filipe Ximenes Belo, SDB iha Israel. Pe. Ilidio simu ordenasaun Saserdotal iha loron 31 maiu 2002, hosi Bispo Michel Sabbah, Patriarca Jerusalem nian.

Ministeriu Nu’udar Na’ilulik

Hosi tinan 2002–2006, Pe. Ilidio hala’o knaar iha komunidade Venilale nu’udar Vise–Pároku no Diretór ba Eskola São Cristovão. Hosi tinan 2006–2008, Pe. Ilidio hala’o knaar iha komunidade Baucau nu’udar ekonomo uma-nian no vice-Pároko.

Hosi tinan 2008–2011 hala’o knaar iha Nunsiatura Apóstolika, Jakarta no simu mós knaar nu’udar Vice–Pároku iha Parokia São João Bosco, Sunter, Jakarta. Hosi tinan 2011–2013, Pe. Ilidio hala’o knaar iha Nunciatura Apostólika, Dili, Timor-Leste, no hela iha komunidade Casa Provincial.

Hosi tinan 2013–2018, Pe. Ilidio hala’o ninia estudu iha Universidade Pontificia São Tomas Aquino iha Manila, Filipina. Nia hasai kursu mestradu iha Faculdade de Direito Canónicu.

Iha inisiu tinan 2019, Pe. Ilidio Correia, SDB, fila-fali mai Timor no hala’o ninia knaar iha komunidade Casa Pos-noviciadu Comoro, Dili, nu’udar Vise-Diretor no Ekonomo uma-nian. Iha inisiu tinan 2020, Pe. Ilidio simu knaar nu’udar Diretór Casa Pos-Noviciadu, Comoro, hala’o mós knaar nu’udar dosente iha Institutu Filosófiku São Francisco de Sales, Comoro, no hala’o mós knaar iha Equipa Estabelesimentu Tribunál Eclesiastical iha Arquidiocese Dili .

Iha loron 18 outubru tinan 2020, tuku 10: 45 dadeer, Pe. Ilídio Correia, SDB husik hela ita hotu ne’ebé nia hadomi hodi fila-fali ba hamutuk ho Maromak ne’ebé nia hadomi no serbí durante nia sei moris iha mundu ne’e.

Lakon ema ida husi ita-nia leet sempre lori matan-been no tristeza maibé mai ita Kristaun sira no liuliu salesiano sira, mate la’os rohan husi buat hotu; mate hanesan odamatan boot atu asesu ba ksolok rohan laek. Konstituisaun Salezianu nian artigu 54 asegura ita katak: “Salesiano simu mate ho roman esperansa nian, hodi hein atu tama ba nia Na’i nia glória. Salesiano ida mate karik hodi serbisu ba klamar sira, kongregasaun sei hetan triunfu boot ida.”

“Atu Na’i haraik ba ita Aman Doben Amo Ilidio Correia, SDB deskansa hakmatek iha Na’i nia kadunan santu.”

Jornalista: Domingos Piedade Freitas

Editór: Cancio Ximenes

HAKEREK NO HATÁN

Please enter your comment!
Please enter your name here