Vise-Ministra Finansa, Sara Lobo Brites. Imajen Tatoli/Egas Cristovão

DILI, 19 outubru 2020 (TATOLI)—Primeiru-Ministru (PM), Taur Matan Ruak, orienta Ministériu Finansa (MF) no Unidade Planeamentu Monitorizasaun no Avaliasaun (UPMA) prepara aprezentasaun proposta Orsamentu Jerál Estadu (OJE) 2021 nian aprezenta ba membru Governu sira molok debate iha Parlamentu Nasionál (PN).

Ministra Finansa ein ezersísiu, Sara Lobo Brites, hateten reuniaun ho Xefe Governu hodi simu orientasaun ba realizasaun enkontru no retiru ne’ebé sei hala’o iha kuarta (21/10) hafoin reuniaun Konsellu Ministru hodi rona aprezentasaun hosi Unidade Planeamentu Monitorizasaun no Avaliasaun (UPMA) konaba orsamentu 2021.

“Enkontru semanál ho Primeiru-Ministru atualiza progresu preparasaun livru orsamentu tékniku sira no serbisu durante fim de semana, Ministériu Finansa no UPMA serbisu hamutuk atubele aselera no entrega ba Parlamentu Nasionál molok fulan-outubru ramata,” atuál Vise-Ministra Finansa relata iha PM Taur iha Palásiu Governu, segunda ne’e.

Notísia Relevante:Governu submete ona Proposta Lei OJE 2021 ba PN

Governante ne’e esplika, Governu sei aprezenta orsamentu tuir programa tanba ne’e Xefe Governu hakarak membru sira bele entende estrutura orsamentu.

Aleinde ne’e, iha tersa (20/10) Governu ne’ebé lideradu hosi MF hamutuk ho Ministériu Solidariedade Sosiál no Inkluzaun (MSSI),  Ministériu Koordenadór Asuntu Ekonómiku  (MKAE), Ministériu Saúde (MS), no akompaña hosi Ministru Prezidénsia Konsellu Ministru, Fidelis Manuel Leite Magalhães, sei halo aprezentasaun kona-ba estabilizasaun ekonómiku ba PN

Orientasaun seluk hosi PM maka atu realiza retiru dala-ida tan ba membru Governu sira iha loron 30 outubru, ho objetivu halo preparasaun di’ak liután ba debate OJE 2021 tanba iha mudansa estrutura aprezentasaun orsamentu.

“Liuliu iha aprezentasaun pur programa, tanba ne’e membru Governu sira tenke entende didi’ak informasaun sira ne’ebé tau iha proposta lei no mós livru orsamentál,” nia akresenta.

Entretantu, proposta OJE 2021 hamutuk biliaun $1,898, kompostu hosi saláriu no vensimentu millaun $239,26, bens no serbisu millaun $421,49, transferénsia públika millaun $669,91, kapitál menór millaun $61,14, no kapitál dezenvolvimentu millaun $503,20.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here