DILI, 19 outubru 2020 (TATOLI)-Durante fulan rua; agostu-setembru, tinan ne’e, Ministériu Públiku (MP) rejista prosesu krime foun ne’ebé tama (entrada) hamutuk 710.
Notísia Relevante : MP halo rekursu kontra desizaun TDD ba krime tráfiku ilísitu droga
“Durante fulan rua iha nivel nasionál inklui Gabinete Kombate Korrupsaun no Kriminalidade Organizada, rejista prosesu foun 710,” Prokuradór Jerál Repúblika (PGR), José Ximenes, informa ba jornalista, hafoin hala’o enkontru ho Prezidente Repúblika (PR), Francisco Guterres ‘Lú-Olo’’, ohin, iha edifísiu Palaçio Prezidensiál, Dili.
José Ximenes, la esplika detallu kona-ba tipu kazu sira ne’e. Maibé nia fó hanoin katak hosi númeru ne’e iha setembru iha Munisípiu Dili iha prosesu kazu foun ne’ebé tama iha 174, Baucau 103, Suai 60-resin no ba agostu iha prosesu 300 -resin.
Nia hateten, durante férias judisiál fulan ida, hahú iha loron 1 agostu to’o ba iha loron 15 setembru, atividade hotu suspende no foin komesa fali iha setembru nian laran, nune’e prejudika prosesu sira, tanba ne’e, prosesu pendente sa’e ba 3051.
“ Mezmu nune’e prosesu hotu movimenta nafatin hanesan hosi prosesu 710 iha fulan setembru nia laran ita nia majistradu sira konsege finaliza prosesu hamutuk 477 iha nivel nasionál,” PGR José Ximenes hateten.
Jornalista : Nelson de Sousa
Editór : Francisco Simões