Kargu diresaun no xefia inklui empreza lokál sira partisipa iha sensibilizasaun prosesu konkursu, iha edifísiu MOP, Caicoli. Imajen/Mídia MOP

DILI, 19 outubru 2020 (TATOLI)–Ministru Obra Públika (MOP), Salvador Eugênio Soares dos Reis Pires, hamutuk ho Diretór Jerál Administrasaun Finansa (DJAF) Januário Barbosa no Diretór Nasionál Aprovizionamentu (DNA) Quintiliano Belo, hala’o sosializasaun kona-ba prosesu konkursu ba empreza lokál sira.

Iha sosializasaun ne’e, Ministru introdús polítika VIII Governu Konstitusionál kona-ba implementasaun projetu sira iha área infraestrutura.

“Projetu hotu ne’ebé implementa tenke liuhosi prosesu aprovizionamentu tanba bainhira Governu halo pagamentu ba projetu ida tenke ho baze legál hanesan kontratu no kompañia sira labele implementa projetu ida bainhira kontratu laiha,” refere nota ne’ebé Agência TATOLI asesu iha segunda ne’e.

Aleinde ne’e, kompañia sira labele promove projetu mesak maibé Governu mak tenke promove no dezenvolve hahú hosi inísiu estudu viabilidade no prosesu konkursu ba kompañia sira to’o hetan manán-na’in hodi asina kontratu.

Atividade sosializasaun ne’e partisipa hosi Prezidente Câmara Comércio Indústria Timor-Leste (CCI-TL) nasionál inklui emprezáriu lokál sira hosi munisípiu Dili.

Jornalista: Cipriano Colo

Editora: Julia Chatarina 

HAKEREK NO HATÁN

Please enter your comment!
Please enter your name here