Imajen/Facebook: Global Inner Peace.

DILI, 19 outubru 2020 (TATOLI)–Organizasaun Global Inner Peace (Community) fó apoiu ai-han no fasilidade bee nian ba komunidade iha Postu Administrativu Ataúro ne’ebé hetan fundu hosi Corea International Corporation Agency (COICA).

Administradór Postu Administrativu Ataúro, Mateus Belo, hateten apoiu ne’e akontese tanba liga ho situasaun pandemia COVID-19 no bailoron naruk hodi afeta ba moris loron-loron nian tanba menus ai-han no labele halo negósiu tanba laiha movimentu.

“Ho ne’e, Global Inner Peace Community apoiu ita-nia komunidade liuhosi fundu COICA nian, no ohin ita hahú halo distribuisaun ba suku Biqueli no sesta semana ne’e sei fahe ba Suku Maquili ho Vila-Maumeta. Depois semana oin mai mak suku Beloi ho Macadade,” Mateus Belo haktuir ba Agência TATOLI via telefónika, segunda ne’e. 

Nia dehan, Global Inner Peace fó apoiu ai-han ba komunidade kbiit laek ba kada suku lima no kada suku iha xefe família 80 mak sei hetan apoiu ai-han hanesan foos, mina, supermie no koto.

Aleinde ida-ne’e, nia haktuir, fahe mós ai-han suplementu hanesan susu-been ba labarik tinan lima (5) mai kraik ne’ebé mak ho nia kondisaun nutrisaun menus, entaun Global Inner Peace apoiu ema 100 kada suku ida.

“Ita iha suku-lima (5) mak hetan apoiu suplementu susu-been ne’e ba ema 500 iha Postu Administrativu Ataúro nian,” nia hateten. 

Nia haktuir, Global Inner Peace mós fó  apoiu fasilidade bee-nian hanesan filtru hamutuk 200 ba suku lima iha Ataúro ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here